Búgin, 18-aprel kúni Ájiniyaz atındaǵı Nókis mámleketlik pedagogikalıq institutınıń rektorı Bayrambay Otemuratov magistratura qánigeliklerinde oqıp atırǵan magistrantlar menen ushırastı.

Ashıq sáwbet tárizinde ótken ushırasıwda sońǵı jıllarda magistratura basqıshında qabıllaw kvotalarınıń kóbeytilgeni, olarǵa qoyılıp atırǵan talaplar, magistrantlardıń shet tillerin biliw dárejesi, basqa da imkaniyatlar haqqında maǵlıwmatlar berildi.

Ásirese, kelesi oqıw jılınan baslap magistratura basqıshında oqıp atırǵan hayal-qızlardıń mámleket tárepinen qollap-quwatlanıwı, sonıń ishinde, tólemli kontrakt pulların mámleketlik byudjetten qaplap beriw hám olardıń bilimlerin bekkemlew maqsetinde sırt ellerge oqıwǵa jiberiw boyınsha ámeliy jumıslar alıp barılatuǵınlıǵı atap ótildi.

Búgingi kúnniń talaplarınan kelip shıǵıp, magistrantlardıń shet tillerin biliw kónlikpelerin arttırıw, xalıqaralıq sertifikatlarǵa iye bolıwı, ilimiy-izertlew jumısların xalıqaralıq standartlar tiykarında júrgiziw máselelerinde pikirlesiwler dawam etti.

Magistrantlar ózlerin qızıqtırǵan sorawlar, zárúr pikir-usınısların rektorǵa berip, olarǵa juwaplar aldı.

Ashıq sáwbetlesiw dawamında atap ótilgen máseleler, tiyisli tapsırmalar boyınsha aldaǵı islenetuǵın jumıslar belgilep alındı.

NMPI baspasóz xızmeti.