Búgin, 24-aprel kúni Ájiniyaz atındaǵı Nókis mámleketlik pedagogikalıq institutında ulıwma bilim beriw mektepleriniń pitkeriwshi klass oqıwshıları arasında ximiya-biologiya pán olimpiadasınıń Qaraqalpaqstan Respublikalıq basqıshı baslandı.

Pán olimpiadasınıń Qaraqalpaqstan Respublikalıq basqıshına rayon (qala)lıq basqıshlarda jeńimpaz dep tabılǵan ulıwma bilim beriw mektepleriniń pitkeriwshi klass oqıwshıları qatnaspaqta.

Kúnniń dáslepki yarımında qatnasıwshılar jazba jumısı arqalı óz bilimlerin sınaqtan ótkeriwi belgilengen bolsa, ekinshi yarımında laboratoriyalıq jumıslardı ámelge asıradı.

Pán olimpiadası Ózbekstan Respublikası Prezidentiniń «Ximiya hám biologiya baǵdarlarında úzliksiz bilimlendiriwdiń sapasın hám ilimniń nátiyjeliligin arttırıw ilajları haqqında»ǵı qararı, Joqarı hám orta arnawlı bilimlendiriw ministrliginiń tiyisli buyrıǵı, sonday-aq, Ájiniyaz atındaǵı Nókis mámleketlik pedagogikalıq institutı hám Qaraqalpaqstan Respublikası Xalıq bilimlendiriw ministrligi arasındaǵı qospa qararǵa muwapıq ótkerilmekte.

Qaraqalpaqstan Respublikalıq basqıshında eń joqarı kórsetkishlerge iye bolǵan 10 oqıwshı kelesi basqısh – joqarı oqıw ornı basqıshına jollama aladı.

Joqarı oqıw ornı basqıshında 1-, 2- hám 3-orındı iyelegen oqıwshılardı joqarı oqıw ornına qabıllaw boyınsha Mámleketlik komissiyasına usınıs beriledi.

NMPI baspasóz xızmeti.