Ózbekstan Respublikası bilimlendiriw mákemelerine oqıwǵa qabıllaw boyınsha Mámleketlik komissiyasınıń 13-sanlı protokolı tiykarında 2022-2023-oqıw jılı ushın respublikalıq joqarı oqıw orınlarınıń bakalavriat tálim baǵdarlarına sáykes test sınaǵı tapsırılatuǵın pánler kompleksi, test sorawlarınıń sanı hám bahalaw kriteriyaları tastıyıqlanǵanı haqqında xabar bergen edik.

Huqıqtanıwshı-bloger Xushnudbek Xudayberdiev abiturientler itibar qaratıwı kerek bolǵan ayırım ózgerislerdi málim etti.

1) Qánigelik blogındaǵı sorawlardıń sanı kóbeytildi. Ótken jılı «specblok»ta 20 dan – ulıwma 40 soraw berilgen edi. Bıyıl 30 sorawdan – ulıwma 60 soraw beriledi;

2) Qánigelik blogında birinshi hám ekinshi pánge beriletuǵın ball muǵdarı parqlanatuǵın boldı. Ótken jılı eki pánge de birdey 3,15 balldan berilgen edi. Bıyıl birinshi orındaǵı áhmiyetli pánge 3,1 ball, ekinshi pánge 2,1 ball beriletuǵın boldı. Demek, bir-birine sáykes 5 baǵdardı saylawda da bıyıl ózgerisler boladı. Ótken jılı ekewine birdey ball berilgeni sebepli birinshi hám ekinshi pánge ajıratılmaǵan edi. Endi bıyıl tek ǵana 2 pán tuwra keliwi jetkilikli emes, olardıń áhmiyetliligi boyınsha ornı da esapqa alınadı;

3) Baǵdarına qaramastan hámme ushın túsetuǵın májbúriy bloktaǵı 3 pánge beriletuǵın ball muǵdarı azaytıldı. Ótken jılı 2,1 balldan berilgen bolsa, bıyıl 1,1 balldan beriletuǵın boldı. Demek, bıyıl májbúriy bloktan kóp ball toplaw imkansız. Ótken jılı májbúriy blok 63 ball bergen bolsa, bıyıl 33 ball toplaw múmkin. Solay eken, bıyıl tiykarǵı ballardı qánigelik pánlerden toplaw múmkin. Yaǵnıy, 2 pánge ulıwma 156 ball (82,5%) berilmekte,-dep jazdı X.Xudayberdiev.

Islam Matekov,
Qaraqalpaqstan xabar agentligi.