Búgin, 27-aprel kúni Ájiniyaz atındaǵı Nókis mámleketlik pedagogikalıq institutında «Geografiya páni hám onı oqıtıwdıń aktual máseleleri» atamasındaǵı respublikalıq ilimiy-teoriyalıq konferenciya óz jumısın basladı.

Konferenciyanıń ashılıw plenarlıq májilisin instituttıń ilimiy isler hám innovaciyalar boyınsha prorektorı M.Jalelov ashıp berip, konferenciyanıń maqseti geografiya páni hám onı oqıtıw boyınsha ilimiy-izertlew jumıslarınıń nátiyjelerin keń túrde dodalaw hám usınıslar beriwden ibarat ekenligin atap ótip, aldaǵı jumıslarına tabıslar tiledi.

Ilajǵa instituttıń Tariyx fakulteti geografiyanı oqıtıw metodikası kafedrasınıń professor-oqıtıwshıları menen birge Qaraqalpaq mámleketlik universiteti, Namangan mámleketlik universiteti, Qarshı mámleketlik universitetinen professorlar, ilimpazlar, sonday-aq, doktorantlar, magistrantlar hám studentler qatnastı.

Konferenciyada atap ótilgenindey, Qaraqalpaqstanda geografiya iliminiń júzege keliw tariyxı 1948-jılı pedagogikalıq institut bazasında usı qánigelik boyınsha kadrlar tayarlawdan baslanǵan bolsa, ótken 75 jıllıq dáwir ishinde túrli basqıshlarda óziniń rawajlanıw jolına iye bolıp kelmekte. Geografiyanı oqıtıwda sırt el tájiriybelerin tereń úyreniw ushın ilimpazlardı stajirovkaǵa jiberiw máselelerinde biraz mashqalalar baqlanǵan dáwirler bolıwına qaramastan búgingi kúnge kelip jaqsı nátiyjeler kózge túse basladı. Atap aytqanda, landshaftlıq transformaciya, geografiyanı oqıtıw metodikası, demografiya, gis texnologiyalar boyınsha ilimiy-izertlew jumısları turaqlı alıp barılıp, ilim doktorları jetilisip shıqpaqta.

Degen menen, geografiya ilimin rawajlandırıw maqsetinde alda turǵan wazıypalar, izertleniwdi talap etip turǵan jańa temalar, mashqalalar barshılıq. Konferenciyada respublikamız aymaǵında mineral baylıqlardıń qazıp alınıwı menen geografiyalıq ózgerislerdiń bolıwı, sonday-aq, qalalar xalqınıń keskin artıwı menen qala geografiyasındaǵı ózgerisler, xızmet kórsetiw geografiyası, awıl xojalıǵın rayonlastırıwdıń geografiyalıq aspektleri, sonıń menen birge, házirgi waqıtta ulıwma bilim beriw mektepleri hám basqa da bilimlendiriw mákemelerinde geografiya pánin oqıtıw boyınsha júzege kelip atırǵan ayırım mashqalalar óz sheshimin kútip turǵanlıǵı, bular boyınsha bolajaq ilimpazlar, doktorantlar hám ilimiy-izleniwshiler izertlew alıp barıwı maqsetke muwapıq ekenligi atap ótildi.

Konferenciyanıń ashılıw plenarlıq májilisinde Qaraqalpaq mámleketlik universiteti professorı R.Ballieva «Qaraqalpaqstan geografiya ilimi hám onıń aldında turǵan wazıypalar», Namangan mámleketlik universiteti docenti K.Boymirzaev «Ferǵana oazisi jerastı suwlarınıń geografiyalıq tarqalıwı hám olardan paydalanıw», Qarshı mámleketlik universiteti docenti X.Bayqabilov «Evropa paytaxt qalaları atamalarınıń tariyxıy-geografiyalıq ózgeshelikleri», Qaraqalpaq mámleketlik universiteti docenti G.Xodjaeva «Reprotuktivlik jaǵday hám onıń xalıqtıń salamatlasıwındaǵı ornı», Nókis mámleketlik pedagogikalıq institutınıń úlken oqıtıwshısı U.Eshimbetov «Qaraqalpaqstan awıl xojalıǵı rawajlanıwınıń ózine tán ózgeshelikleri» atamalarındaǵı bayanatları menen shıǵıp sóyledi.

Sonıń menen birge, ilajda basqa da qánigeler, miymanlar, magistrantlar hám studentler sózge shıǵıp, bayanatlarda keltirilgen mashqalalar hám juwmaqlar boyınsha óz pikirlerin bildirdi.

Konferenciya óz jumısın sekciyalar boyınsha dawam ettirdi.

Ilaj erteń, 28-aprel kúni óz jumısın juwmaqlaydı.

NMPI baspasóz xızmeti.