Búgin, 29-aprel kúni Nókis qalasındaǵı Qaraqalpaq mámleketlik jas tamashagóyler teatrında Ájiniyaz atındaǵı Nókis mámleketlik pedagogikalıq institutı tárepinen «Ózbekstan – ulıwma úyimiz» súreni tiykarında milletler aralıq tatıwlıq festivalı bolıp ótti.

Festival sheńberinde institutta oqıp, bilim alıp atırǵan túrli millet wákilleri, sheber studentler tárepinen islengen milliy kiyimler, qol óneri úlgileri, súwretler kórgizbesi shólkemlestirildi.

Búgingi kúnde elimizde bir júz otızdan aslam millet hám xalıqlardıń wákilleri bir shańaraqtıń perzentlerindey tatıwlıqta, awızbirshilikte jasap, túrli tarawlarda nátiyjeli miynet etpekte. Barlıq millet hám xalıqlardıń tili, mádeniyatı, úrp-ádet hám dástúrlerin saqlaw jáne rawajlandırıw ushın barlıq sharayatlar jaratılǵan. Mámleketimiz tárepinen hár qıylı milletler arasında óz ara miyrim-shápáátti bunnan bılay da bekkemlewge ayrıqsha itibar qaratılmaqta.

– Derlik 90 jıllıq tariyxqa iye Nókis mámleketlik pedagogikalıq institutında házirgi waqıtta 17 mıńǵa shamalas studentler bilim almaqta. Bilimlendiriw 5 tilde alıp barılatuǵın bul ullı dárgayda qaraqalpaq, ózbek, qazaq, túrkmen, rus, koreys, qırǵız, ázerbayjan, bashqurt, uyǵır hám tatar sıyaqlı ulıwma 11 milletke tiyisli studentler bir shańaraqtıń perzentlerindey, awızbirshilikte oqıp atır. Olar tek ǵana institutta emes, sonıń menen birge, respublikamız kóleminde ótkerilip kiyatırǵan ulıwma xalıqlıq ilajlarda da tatıwlıq penen birgelikte qatnasıp, úlken nátiyjelerdi qolǵa kirgizip kelmekte. Usınday jaǵdaydıń ózi tikkeley Ǵárezsizligimizdiń kóp milletli xalqımızǵa bergen ullı jemisi dep esaplaymız, – deydi instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov.

Festival sheńberinde instituttıń «Tumaris» xalıq ansambli hám talantlı studentleriniń atqarıwındaǵı túrli millet wákilleriniń qosıqları, ayaq-oyınlarınan ibarat koncert baǵdarlaması jıynalǵanlar itibarına usınıldı.

Festival juwmaǵında ilimiy-pedagogikalıq jumıslar menen birge, ruwxıy-aǵartıwshılıq islerinde ayrıqsha belsendilik kórsetip, shólkemlestiriw jumıslarına múnásip úles qosıp kiyatırǵan bir topar pedagog-xızmetkerler Qaraqalpaqstan Respublikası Ministrler Keńesi hám institut rektoratı atınan sıylıqlandı.

Ilajǵa Qaraqalpaqstan Respublikası Ministrler Keńesi Baslıǵınıń orınbasarı R.Saparbaev qatnastı.

Islam Matekov,
NMPI baspasóz xatkeri.
Avtordıń túsirgen fotoları.