«Dúnya júzilik miynetti qorǵaw kúni»ne baǵıshlap ótkerilgen «Miynetti qorǵaw hám qáwipsizligi boyınsha jámáátlik qadaǵalawdı shólkemlestiriw» respublikalıq tańlawınıń birinshi basqıshında Ájiniyaz atındaǵı Nókis mámleketlik pedagogikalıq institutı 1-orındı jeńip aldı.

Ózbekstan kásiplik awqamları Federaciyasınıń Qaraqalpaqstan Keńesi imaratında 28-aprel – Dúnya júzilik miynetti qorǵaw kúnine baǵıshlanǵan «Miynetti qorǵawdıń nátiyjeli mádeniyatın birgelikte sáwlelendiremiz» atamasında tańlaw ótkerildi.

Ilaj qatnasıwshıları miynetti qorǵaw boyınsha paydalanılatuǵın kórgizbeli qurallar menen tanısıp bolǵannan soń, federaciyanıń Qaraqalpaqstan Keńesiniń májilisler zalında sánege baǵıshlanǵan dógerek sáwbetine qatnastı.

Dógerek sáwbetiniń juwmaǵında «Miynetti qorǵaw hám qáwipsizligi boyınsha jámáátlik qadaǵalawdı shólkemlestiriw» respublikalıq tańlawınıń birinshi basqıshında Ózbekstan bilimlendiriw hám ilim xızmetkerleri kásiplik awqamı tarawında «Eń jaqsı kárxana» nominaciyası boyınsha Ájiniyaz atındaǵı Nókis mámleketlik pedagogikalıq institutı 1-orındı iyeledi.

Jeńimpazlar qımbat bahalı sawǵalar hám diplomlar menen sıylıqlandı.