Ájiniyaz atındaǵı Nókis mámleketlik pedagogikalıq institutında Tábiyǵıy pánler fakultetiniń shólkemlestiriwinde «Tábiyǵıy pánlerdiń aktual máseleleri» atamasındaǵı III xalıqaralıq ilimiy-teoriyalıq konferenciyası bolıp ótti.

Konferenciyanı instituttıń ilimiy isler hám innovaciyalar boyınsha prorektorı M.Jalelov ashıp berdi.

Atap ótilgenindey, sońǵı jıllarda Aralboyı regionında ekologiyalıq jaǵdaydı túp-tiykarınan jaqsılaw, aymaqtı sociallıq-ekonomikalıq rawajlandırıwdı jedellestiriw jáne xalıqtıń turmıs tárizi hám dáramatların arttırıwǵa baǵdarlanǵan keń kólemli reformalar ámelge asırıldı.

Aral teńiziniń qurıǵan bóliminde ekoturizmdi jaqsılaw, izertlewler hám innovaciyalardıń aldınǵı tájiriybelerin engiziw maqsetinde Ózbekstan Respublikası Prezidenti janındaǵı Aralboyı xalıqaralıq innovaciyalıq orayı hám Birlesken Milletler Shólkeminiń Aralboyı regionı ushın Insan qáwipsizligi boyınsha kóp tárepleme sheriklik trast fondı shólkemlestirildi, sonday-aq, Aralboyı regionın ekologiyalıq innovaciyalar hám texnologiyalar aymaǵı dep járiyalaw haqqında Birlesken Milletler Shólkemi Bas Assambleyasınıń arnawlı rezolyuciyası qabıl etildi.

Konferenciyada Nawayı mámleketlik kánshilik hám texnologiyalar universitetinıń professorı F.Umirov «Mahalliy minerallar asosida oqova suvlarini tozalashning iqtisodiy samarali usullarini ishlab chiqish», Rossiya mámleketlik neft hám gaz universitetinen ximiya ilimleriniń kandidatı M.Kilyanov «Оборудование и технологии водоподготовки для очистки промышленных и подтоварных вод», ÓzRIA Qaraqalpaqstan bólimi Qaraqalpaq tábiyǵıy pánler ilimiy-izertlew institutınıń úlken ilimiy xızmetkeri Q.Xajibaev «Orol dengizining artemiya sistalaridan parrandalar uchun oziq-ovqat qoʻshimchasini yaratish», Ózbekstan Ilimler Akademiyası Botanika institutınıń úlken ilimiy xızmetkeri T.Xolmuradova «Tarvuz (citrullus lanatus (thunb.) matsum&nakai)ning zamburugʻ kasalliklari», usı instituttıń úlken ilimiy xızmetkeri S.Misirov «Central Asian species of the genus asparagus l. in the Tashkent botanical garden», NMPI ximiyanı oqıtıw metodikası kafedrasınıń úlken oqıtıwshısı Z.Bekturganova «Проблемное формирование экспериментальных умений учащихся в процессе обучения химии» atamalarındaǵı bayanatları menen shıǵıp sóyledi.

Ilajda tábiyǵıy pánlerdiń búgingi mashqalaları, olardıń sheshimleri, sonday-aq, aldaǵı wazıypalar boyınsha ilimiy tiykarlanǵan pikir-usınıslar bildirildi.

Konferenciya óz jumısın sekciyalarda dawam ettirdi.

NMPI baspasóz xızmeti.