Búgin, 15-may kúni respublikalıq «Jaslar hawazı» festivalınıń juwmaqlawshı basqıshı Bozataw rayonında bolıp ótti.

Rayondaǵı Jaslar orayı aldında ulıwma bilim beriw mákemeleri menen birge, joqarı oqıw orınlarınıń kórgizbeleri, rayon jasları qatnasıwında intellektual oyınlar, sheberlik sabaqları hám basqa da mádeniy, ruwxıy-aǵartıwshılıq ilajları ótkerildi.

– Ájiniyaz atındaǵı Nókis mámleketlik pedagogikalıq institutı tárepinen rayondaǵı mektep oqıwshıları ushın intellektual jarıs ótkerildi. Jarıs juwmaǵında jeńimpaz bolǵan komandalardı sıylıqlaw menen birge institut esabınan Nókis qalasına sayaxat etiwin shólkemlestiriw boyınsha kelisip aldıq. Sonıń menen birge, hár bir fakultet ózleriniń qánigelikleri boyınsha kórgizbeler, sheberlik sabaqları, shet tilleri, málimleme texnologiyaları boyınsha seminarlar, psixologiyalıq treningler, kitapqumarlıq ilajların ótkerdik. Jaslar orayı aldında instituttıń «Tumaris» xalıq ansambli hám talantlı studentleriniń atqarıwında koncert baǵdarlaması rayon xalqı hám miymanları kewlinde kóterińkilik payda etti,-deydi institut rektorı Bayrambay Otemuratov.

Berdaq baǵında respublikamızdıń hár bir rayonı ushın qaraúyler tigilip, kórkem óner sheberleriniń atqarıwındaǵı koncert baǵdarlamaları, awıl xojalıǵı hám qol miyneti ónimleriniń kórgizbeleri shólkemlestirildi.

Festival sheńberinde milliy taǵamlar tańlawı da ótkerilip, tóreshiler quramı aǵzaları tárepinen bahalandı.

Sonday-aq, usı baǵda ornatılǵan qaraqalpaq ádebiyatınıń klassik wákili Berdaq Ǵarǵabay ulınıń byustine gúller qoyılıp, húrmet kórsetildi.

Respublikalıq «Jaslar hawazı» festivalı sıylıqlaw saltanatı hám gala-koncerti menen juwmaqlanadı.

Tómende siz usı festival sheńberinde ótkerilgen ilajlardan jurnalist Islam Matekov tárepinen tayarlanǵan fotoreportajdı tamashalawıńız múmkin.

Islam Matekov,
NMPI baspasóz xatkeri.
Avtordıń túsirgen fotoları.