Búgin, 20-may kúni Ájiniyaz atındaǵı Nókis mámleketlik pedagogikalıq institutında Tariyx fakulteti milliy ideya, ruwxıylıq tiykarları hám huqıq tálimi kafedrasınıń shólkemlestiriwinde «Jańa Ózbekstan ideyası hám rawajlanıw basqıshınıń ruwxıy-aǵartıwshılıq, siyasiy-huqıqıy, sociallıq-ekonomikalıq máseleleri, jaslardıń belsendiligin arttırıw mashqalaları» atamasındaǵı respublikalıq ilimiy-teoriyalıq konferenciya bolıp ótti.

Konferenciyanıń ashılıw plenarlıq májilisine instituttıń professor-oqıtıwshıları menen birge Respublikalıq Ruwxıylıq hám aǵartıwshılıq orayı Qaraqalpaqstan Respublikası bólimi, Ózbekstandaǵı joqarı oqıw orınları, ilimiy-izertlew oraylarınan qánigeler, professorlar, doktorantlar, magistrant hám studentler qatnastı.

Ilajdı instituttıń ilimiy isler hám innovaciyalar boyınsha prorektorı M.Jalelov basqarıp bardı.

Konferenciyada sózge shıqqan Respublikalıq Ruwxıylıq hám aǵartıwshılıq orayı Qaraqalpaqstan Respublikası bólimi baslıǵı, tariyx ilimleriniń kadidatı, professor T.Atamuratov hám instituttıń Tariyx fakulteti dekanı, tariyx ilimleriniń doktorı, professor M.Sarıbaevlar búgingi kúnde elimizde Prezident Sh.Mirziyoev basshılıǵında úzliksiz ruwxıy tárbiya koncepciyasınıń islep shıǵılǵanlıǵı, onıń keleshek áwladlar tárbiyasındaǵı áhmiyeti, házirgi waqıtta jas áwlad tárbiyasında shańaraq-bilimlendiriw dárgayı – máhálle strukturası tiykarında ámelge asırılıp atırǵan jumıslardıń mazmunı boyınsha jıynalǵanlarǵa keń túrde maǵlıwmatlar berdi.

Mámleketimiz basshısı: «Biz mámleketimizde qanday reformalardı ámelge asırsaq, eń aldı menen, sizlerdey jaslarǵa, sizlerdiń kúsh-jigerińiz, erk-ıqrarıńızǵa súyenemiz. Hámmeńiz jaqsı bilesiz, búgin óz aldımızǵa úlken maqsetlerdi qoyǵanbız. Ana Watanımızda Úshinshi Renessans tırnaǵın jaratıwǵa kiristik. Biz shańaraq, mektepke shekemgi bilimlendiriw, mektep hám joqarı bilimlendiriwdi, sonday-aq, ilimiy-mádeniy dárgaylardı aldaǵı Renessanstıń eń áhmiyetli buwınları dep esaplaymız»,-dep aytıp ótken edi Ózbekstan jasları forumında shıǵıp sóylegen sózinde.

Shınında da, elimizde ullı ata-babalarımız ál-Beruniy, ál-Xorezmiy, Zamaxshariy, ál-Buxariy, bulardan keyingi dáwirlerde Mırza Ulıǵbek, Áli Qusshı hám basqa da enciklopedist ilimpazlarımız tárepinen ámelge asırılǵan shıǵıs Oyanıw dáwiriniń múnásip dawamshıların tárbiyalaw baslı maqsetlerimizdiń biri bolıp esaplanadı.

Konferenciyanıń ashılıw plenarlıq májilisinde Samarqand mámleketlik arxitektura hám qurılıs institutı jámiyetlik pánler kafedrasınıń baslıǵı, filosofiya ilimleri boyınsha filosofiya doktorı A.Quldoshev, Respublikalıq Ruwxıylıq hám aǵartıwshılıq orayı Qaraqalpaqstan Respublikası bólimi bas qánigesi CH.Elmuratov, instituttıń milliy ideya, ruwxıylıq tiykarları hám huqıq tálimi kafedrası docenti, pedagogika ilimleriniń kandidatı T.Qudaybergenova, usı kafedranıń docenti, filosofiya ilimleriniń kandidatı Z.Seytova, instituttıń tayanısh doktorantı R.Arziev, 1-kurs magistrantı A.Ramatullaev hám basqalar tálim-tárbiya procesinde jaslardı sociallıq belsendilikke baǵdarlaw, jańa Ózbekstanda ruwxıylıq hám aǵartıwshılıq orayınıń jumısların jetilistiriw, jaslardı ruwxıy-etikalıq jaqtan tárbiyalawda óz ara birge islesiwdi ámelge asırıw, Ózbekstandı rawajlandırıw strategiyasınıń sociallıq-ekonomikalıq tiykarları hám usı sıyaqlı tematikalar boyınsha bayanatlar jasadı.

Konferenciya óz jumısın sekciyalarda dawam ettirdi.

NMPI baspasóz xızmeti.