Búgin, 24-may kúni Ájiniyaz atındaǵı Nókis mámleketlik pedagogikalıq institutında Qaraqalpaqstan xalıq muǵallimi, pedagogika ilimleriniń kandidatı, docent Arzı Pazılovtıń 70 jıllıq yubileyine baǵıshlanǵan «Zamanagóy tálim hám tárbiya texnologiyaları: tájiriybeler, mashqalalar hám perspektivalar» atamasındaǵı respublikalıq ilimiy-ámeliy konferenciya bolıp ótti.

Konferenciyanıń ashılıw plenarlıq májilisine institut jámááti, professor-oqıtıwshılar, fakultet dekanları, kafedra baslıqları hám respublikamızdaǵı basqa joqarı oqıw orınları, ilimiy-izertlew oraylarınan ilimpazlar, ministrlikler, mákeme hám shólkemlerdiń wákilleri, alımnıń birge oqıǵan, jumıs islegen dosları, ustazları, aǵayin-tuwısqanları, perzentleri, aqlıqları hám kóp sanlı shákirtleri qatnastı.

Ilajdı instituttıń jaslar máseleleri hám ruwxıy-aǵartıwshılıq isleri boyınsha prorektorı Q.Qodirov ashıp berdi hám institut rektoratı tárepinen tayarlanǵan qutlıqlaw sózi, sonday-aq, estelik sawǵaların tapsırdı.

Arzı Pazılov 1952-jılı Xojeli rayonında ápiwayı jumısshı shańaraǵında dúnyaǵa kelgen. 1968-jılı orta mektepti pitkergen bolsa, 1970-1974-jılları Qaraqalpaq mámleketlik pedagogikalıq institutında (házirgi Ájiniyaz atındaǵı Nókis mámleketlik pedagogikalıq institutı) baslawısh tálim metodikası qánigeligi boyınsha oqıdı.

Miynet jolı dawamında mektep muǵallimi, institut stajyor-izleniwshisi, Tashkent mámleketlik universiteti aspirantı, kafedra laborantı, jaslar awqamı xatkeri, orta arnawlı oqıw ornı muǵallimi, direktor orınbasarı sıyaqlı jumıslarda islep, kóplegen tájiriybe toplaǵan.

1990-2012-jıllar aralıǵında institutta kafedra baslıǵı, fakultet dekanı, oqıw-metodikalıq bólim baslıǵı sıyaqlı lawazımlarda pidayılıq penen jemisli miynet etti. Házirgi waqıtta instituttıń pedagogika kafedrasınıń baslıǵı lawazımında jumıs islemekte.

A.Pazılov 1989-jılı pedagogika ilimleriniń kandidatı, docent Yu.Umarovtıń ilimiy basshılıǵında kandidatlıq dissertaciya jumısın tabıslı qorǵadı. Pedagogika teoriyası, tariyxı, ruwxıy, ádep-ikramlılıq tárbiyası máseleleri boyınsha izertlew jumısların alıp barǵan alım 300 den aslam ilimiy miynetlerdiń avtorı bolıp esaplanadı.

Ilimpazdıń «Pedagogika», «Talaba amaliyotchilar uchun metodik qoʻllanma», «Tárbiya haqqında oylar», «Pedagogika teoriyası hám tariyxı páninen testler toplamı», «Pedagogika teoriyası», «Pedagogika tariyxı» atamalarındaǵı sabaqlıqları baspadan shıqqan bolsa, házirgi waqıtta onıń basshılıǵında birneshe ilimpazlar menen birgelikte Qaraqalpaqstanda birinshi márte «Pedagogikalıq enciklopediya»nıń tórt tomlıǵı baspaǵa tayarlanbaqta.

Onıń avtorlıǵındaǵı sabaqlıqlar Ózbekstan Respublikası kóleminde ótkerilip kiyatırǵan «Jıldıń eń jaqsı sabaqlıǵı hám oqıw qollanbasınıń avtorı» tańlawında birneshe márte jeńimpazlar qatarınan orın alıp kelmekte. Sonday-aq, onıń ilimiy basshılıq etip kiyatırǵan shákirtleri arasınan Prezident hám Islam Kárimov atındaǵı mámleketlik stipendiyalar tańlawlarında jeńimpaz bolǵan jaslar jetilisip shıqqan.

A.Pazılov baspasóz betlerinde turaqlı túrde maqalalar járiyalap, óziniń jámiyettegi júz berip atırǵan waqıya-hádiyselerge múnásibetin bildirip, jámiyetlik oy-pikirdiń qáliplesiwine xızmet etip kelmekte.

Alımnıń usınday pidayı xızmetleri húkimetimiz tárepinen joqarı bahalanıp kelinbekte. Ol 1994-jılı Qaraqalpaqstan Respublikası Joqarǵı Keńesiniń húrmet jarlıǵı, 2000-jılı «Shuhrat» medalı, 2008-jılı Qaraqalpaqstan Respublikası Xalıq bilimlendiriw aǵlası kókirek nıshanı, 2012-jılı «Qaraqalpaqstan Respublikası xalıq muǵallimi» húrmetli ataǵı, 2016-jılı «Ózbekstan Respublikası ǵárezsizliginiń 25 jıllıǵı» estelik nıshanı menen sıylıqlanǵan.

Konferenciyada filologiya ilimleriniń doktorı, professor K.Allambergenov, filologiya ilimleriniń doktorı, professor K.Qurambaev hám pedagogika ilimleriniń doktorı, professor Ó.Álewovlar yubiley iyesi, kórnekli alım, pedagog Arzı Pazılovtıń ómiri hám ilimiy-pedagogikalıq jumısları haqqındaǵı bayanatların oqıp berdi.

Konferenciya óz jumısın sekciyalarda dawam ettirdi.

NMPI baspasóz xızmeti.