Usı jıldıń 24-31-may kúnleri aralıǵında Jizzaq wálayatında sporttıń voleybol túri boyınsha XXIX Ózbekstan chempionatınıń juwmaqlawshı besinshi tur jarısları bolıp ótti.

Fevral ayında start alǵan Ózbekstan birinshiliginiń dáslepki tur oyınlarınan berli qarsılas komandalarǵa hesh qanday imkaniyat qaldırmay, upaylar boyınsha birinshilikti qoldan bermey kelgen Qaraqalpaqstan Respublikasınıń Ájiniyaz atındaǵı Nókis mámleketlik pedagogikalıq institutı qızlar saylandı komandası besinshi tur jarıslarında da ózleriniń joqarı sport sheberliklerin kórsetti.

Ótkerilgen bes tur nátiyjelerine muwapıq, ulıwma 58 upay menen Ájiniyaz atındaǵı Nókis mámleketlik pedagogikalıq institutı qızlar saylandı komandası voleybol boyınsha XXIX Ózbekstan chempionatınıń jeńimpazı boldı.

Ekinshi orındı 53 upay toplaǵan Namangan, al úshinshi orındı 52 upay toplaǵan Ándijan wálayatı komandaları iyeledi.

CHempionattıń sıylıqlaw saltanatında bir qatar nominaciyalar boyınsha da jeńimpazlar anıqlanıp, olar arasında Ájiniyaz atındaǵı Nókis mámleketlik pedagogikalıq institutı qızlar saylandı komandası bas treneri Azat Kazakov «Eń jaqsı trener», NMPI voleybol komandası «Eń jaqsı komanda», komanda aǵzalarınan Indira Nasratdinova «Eń jaqsı oyınshı», Gúlbazar Nuranova «Eń jaqsı tosıqshı», Maqsuda Yuldasheva «Eń jaqsı komanda sárdarı» nominaciyaları menen sıylıqlandı.

Solay etip, voleybol boyınsha XXIX Ózbekstan chempionatı jeńimpazı bolǵan Qaraqalpaqstan Respublikasınıń Ájiniyaz atındaǵı Nókis mámleketlik pedagogikalıq institutı qızlar saylandı komandası aǵzalarına diplom, altın medallar hám chempionlıq kubogı saltanatlı túrde tapsırıldı.

Islam Matekov,
NMPI baspasóz xatkeri.