Ózbekstan Respublikası Prezidentiniń «Mámleketlik joqarı bilimlendiriw mákemelerine oqıwǵa qabıllaw processlerin shólkemlestiriw haqqında»ǵı qararına muwapıq studentlerdiń oqıwın mámleketlik joqarı oqıw orınlarına kóshiriw boyınsha tómendegi tártip engizilmekte.

Yaǵnıy, bunnan bılay mámleketlik joqarı oqıw orınları arasında studentlerdiń oqıwın kóshiriwge tek ǵana tómendegi jaǵdaylarda ruxsat beriledi:

– student shańaraq qurıwı múnásibeti menen ómirlik joldası turaqlı jasaytuǵın aymaqtaǵı joqarı oqıw ornına oqıwın kóshiriw ushın múrájat etkende;

– mámleketlik uyımlardıń xızmetkerleriniń jumıs ornı ózgergen jaǵdayda onıń ómirlik joldası yamasa erjetpegen perzenti oqıwın kóshiriw ushın múrájat etkende, tiyisli ministrlik (mákeme) basshısınıń usınısı tiykarında.

Sırt mámleketler hám elimizde jumıs alıp barıp atırǵan sırt ellerdiń joqarı oqıw orınlarınıń filialları hám mámleketlik emes joqarı bilimlendiriw shólkemlerinen mámleketlik joqarı oqıw orınlarına oqıwın kóshiriw ámeldegi tártipke muwapıq shólkemlestiriledi.

Islam Matekov,
NMPI baspasóz xatkeri.