Búgin, 20-iyunnan baslap 2022-2023-oqıw jılı ushın akademiyalıq liceylerge ulıwma bilim beriw mektepleriniń 9-klass oqıwshılarınan hújjetlerdi litsey.edu.uz portalı arqalı onlayn tárizde qabıllaw processleri baslandı. Bul haqqında Joqarı hám orta arnawlı bilimlendiriw ministrligi xabar berdi.

Abiturientler dizimnen ótiw procesinde sistemaǵa jeke maǵlıwmatların kirgiziw menen birge tómendegi hújjetlerdi elektron formada (PDF, JPEG) júklewi kerek:

– bıyılǵı jılı 9-klasstı pitkergeni haqqındaǵı attestat;
– 3,5 x 4,5 sm ólshemdegi 1 dana reńli fotosúwret;
– oqıwǵa jeńillikli kiriw huqıqın beretuǵın hújjetler – pán olimpiadası, tańlawlar, jarıs jeńimpazı ekenligin tastıyıqlaytuǵın diplom, sertifikat, gúwalıq, sonday-aq, shet tili hám ulıwma bilim beriw pánlerin biliw dárejesi haqqındaǵı milliy yamasa xalıqaralıq sertifikat (eger bolsa).

Abiturientler dizimnen ótiwde:

– ózleri saylaǵan onǵa shekemgi akademiyalıq liceydiń birewden sáykes baǵdarın saylawı (bunda bilimlendiriw tili birdey bolıwı kerek);
– qaysı shet tilinen kiriw test sınaǵın tapsırıwın belgileydi.

Sonday-aq, abiturient ózi saylaǵan aymaqta (Qaraqalpaqstan Respublikası, wálayatlardıń orayı yamasa Tashkent qalasında) shólkemlestiriletuǵın kiriw test sınaqlarında qatnasadı.

Qabıllaw processleri menen baylanıslı qosımsha maǵlıwmatlardı akademiyalıq liceylerde shólkemlestirilgen «Másláhát orayları»nıń telefon nomerleri arqalı bilip alıwıńız múmkin.

Maǵlıwmat ornında atap ótiw kerek, Tashkent mámleketlik yuridikalıq universiteti janındaǵı akademiyalıq licey ushın hújjetler litsey.dtm.uz saytı arqalı qabıllanadı.

NMPI baspasóz xızmeti.