30-iyun – Jaslar kúni múnásibeti menen Ájiniyaz atındaǵı Nókis mámleketlik pedagogikalıq institutında «Jaslar aylıǵı» ilajları sheńberinde rektor hám jaslar ushırasıwı bolıp ótti.

Ushırasıwda institut rektorı Bayrambay Otemuratov studentler menen elimizde pedagog kadrlar tayarlaw baǵdarındaǵı ámelge asırılıp atırǵan reformalar hám olardıń nátiyjeleri haqqında sáwbetlesiw ótkerdi.

Atap ótilgenindey, búgingidey globallasıw sharayatında Úshinshi Renessanstıń tiykarın jaratatuǵın áwladlardıń tálim-tárbiyası mámleketimiz hám jámiyetimiz aldında turǵan baslı máselelerdiń biri bolıp qalmaqta.

Bunda, ásirese, mektepke shekemgi hám xalıq bilimlendiriw tarawlarına pedagog kadrlardı tayarlap beriwde óz qádiriyatlarına hám uzaq jıllıq tariyxına iye bolǵan Nókis mámleketlik pedagogikalıq institutında bilimlendiriwdiń sapasın jetilistiriw, zamanagóy texnologiyalar, oqıtıw usılların ámeliyatqa engiziw arqalı joqarı potenciallı kadrlar tayarlawǵa ayrıqsha itibar qaratılmaqta.

Institut rektorı bul baǵdarda Ózbekstan Respublikası Prezidentiniń 2022-jıl 21-iyundaǵı «Pedagogikalıq bilimlendiriwdiń sapasın arttırıw hám pedagog kadrlar tayarlaytuǵın joqarı bilimlendiriw mákemeleriniń jumısların bunnan bılay da rawajlandırıw ilajları haqqında»ǵı qararınıń áhmiyetine ayrıqsha toqtaldı.

Sonıń ishinde, 2022-2023-oqıw jılınan baslap mektepke shekemgi, ulıwma orta, orta arnawlı hám professional bilimlendiriwde paydalanılatuǵın sabaqlıqlar jáne metodikalıq qollanbalardı pedagog kadrlar tayarlaytuǵın JOOlarǵa olardıń talapnamasına muwapıq pullı tiykarda usınıw tártibi engiziliwi úlken jańalıq bolǵanlıǵı, bul bilimlendiriw sistemasında ushırasıp atırǵan ayırım mashqalalardı saplastırıwǵa tiykar bolatuǵınlıǵın atap ótti. Sonday-aq, qarar tiykarında pedagog kadrlar tayarlaytuǵın JOOlardıń kúndizgi bilimlendiriw túrinde oqıp atırǵan 2-4-kurs studentleri ushın háptelik oqıw shınıǵıwları «4+2» tártibinde (sabaqlardıń 4 kúni JOOda, 2 kúni mektepke shekemgi hám ulıwma orta bilim beriw mákemelerinde ámeliyat ótew tártibinde) alıp barılıwı túsindirildi.

Ushırasıwda rektor Bayrambay Otemuratov institutta oqıtıwdıń sapasın arttırıw ushın ámelge asırılatuǵın jumıslar haqqında da jaslarǵa maǵlıwmatlar berdi.

Atap aytqanda, instituttıń altınshı oqıw imaratı janında laboratoriyalıq kompleks qurılatuǵınlıǵı, ol jerde mekteplerdiń biologiya hám fizika pánlerinen ótiletuǵın laboratoriyalıq jumıslardı ámelge asırıw imkaniyatı jaratılıwı, magistraturaǵa qabıllawda shet tilinen xalıqaralıq yamasa milliy sertifikat bolıwı, institutta jańadan túrkologiya qánigeligi boyınsha magistratura qánigeligin ashıw jobalastırılıp atırǵanı, sonday-aq, oqıw procesine shet ellerden professor-oqıtıwshılardı alıp keliw boyınsha ámelge asırılıp atırǵan jumıslarǵa toqtaldı.

Student-jaslar rektor menen ótkerilgen ushırasıwda institutta oqıw menen birgelikte materiallıq-texnikalıq bazanı jetilistiriw, ádebiy kitaplar hám oqıw ádebiyatların kóbeytiw, sport hám salamatlastırıw ilajların ótkeriw jáne basqa máseleler boyınsha sorawlarına juwaplar aldı hám pikir-usınısların bildirdi.

NMPI baspasóz xızmeti.