Búgin, 28-iyun kúni Ájiniyaz atındaǵı Nókis mámleketlik pedagogikalıq institutında Ózbekstan Respublikasınıń Konstituciyasına kirgiziliwi kútilip atırǵan ózgeris hám qosımshalardıń mazmunı jáne áhmiyetine baǵıshlanǵan ushırasıw bolıp ótti.

Ushırasıwǵa Ózbekstan Respublikası Oliy Majlisi Nızamshılıq palatasınıń deputatları Muxtar Ibragimov hám Ruslan Jumamuratov, sonday-aq, instituttıń professor-oqıtıwshıları, dekan orınbasarları, tyutorlar qatnastı.

Ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp bardı.

Atap ótilgenindey, konstituciyalıq nızamlardıń joybarları Ózbekstan Respublikası Oliy Majlisiniń Nızamshılıq palatası tárepinen birinshi oqılıwda qabıl etilip, birden-bir «Ózbekstan Respublikasınıń Konstituciyasına ózgeris hám qosımshalar kirgiziw haqqında»ǵı Ózbekstan Respublikasınıń Konstituciyalıq nızamı joybarına birlestirildi.

Konstituciyalıq nızam joybarı Bas nızamımızdıń 64 statyasına 200 den aslam ózgerisler kirgiziwdi názerde tutadı. Sonday-aq, 6 jańa statya menen 16 jańa norma kirgizilmekte.

Olardıń basım kópshiligi mazmunı-áhmiyeti jaǵınan «insan – jámiyet – mámleket», «Jańa Ózbekstan – sociallıq mámleket» degen principlerdi konstituciyalıq qaǵıyda sıpatında belgilewge, xalıqshıl mámleket qurıwǵa, insan huqıqlarınıń támiyinleniwi hám sociallıq jaqtan qorǵalıwın kúsheytiwge, jaslardıń huqıq hám máplerin tolıq támiyinlewge baǵdarlanǵan.

Jańalanıwı kútilip atırǵan Konstituciya mámlekettiń uzaq jıllıq rawajlanıw strategiyaları, xalqımızdıń erteńgi abadan turmısı ushın bekkem huqıqıy tiykar bolıwı atap ótildi.

Sonıń menen birge, Konstituciyalıq dúzetiwler jámiyettiń túrli sociallıq qatlamlarına kiretuǵın puqaralardıń jeke, sociallıq, ekonomikalıq, siyasiy, mádeniy hám ekologiyalıq huqıqların támiyinlewge, qorǵawǵa baǵdarlanǵan tikkeley isleytuǵın normalarǵa aylanıwı aytıp ótildi.

Hár qıylı reformalar procesinde insan mápleri baslı ólshem bolıwın támiyinlew, jeke múlktiń qolqatılmaslıǵı, jerge iyelik etiw huqıqı, puqaralıq jámiyeti institutlarınıń ornın konstituciyalıq dárejege kóteriw, mámleketlik hákimiyat tiykarların jetilistiriw áhmiyetli ekenligi haqqında pikirler bildirildi.

NMPI baspasóz xızmeti.