Ájiniyaz atındaǵı Nókis mámleketlik pedagogikalıq institutı hám instituttıń kásiplik awqamı komiteti tárepinen paytaxtımız Nókis qalasındaǵı «Ámiwdárya», «Kók ózek» hám «Qumbız awıl» mákan puqaralar jıyınları aymaǵında jasaytuǵın «Temir dápter», «Hayallar dápteri»ne kirgen, sonday-aq, sociallıq járdemge mútáj shańaraqlardıń balaları ushın Samarqand qalasına sayaxat shólkemlestirildi.

Sayaxat sheńberinde 50 den aslam balalar «Jer júziniń jamalı» dep táriyp berilgen tariyxıy qaladaǵı arxitekturalıq estelikler, atap aytqanda, Registan maydanı, Góri Ámir, Biybixanım, sonday-aq, Ózbekstannıń birinshi Prezidenti Islam Kárimovtıń mavzoleylerin zıyaratladı hám muzeyler, dem alıw orınlarında bolıp, mádeniy dem aldı.

Búgin institut bas imaratı aldında sayaxatshı balalar saltanatlı túrde kútip alındı.

Ilajda instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov sózge shıǵıp, institutta máhálleler hám olardaǵı jaslar menen birgelikte alıp barılıp atırǵan jumıslarǵa ayrıqsha toqtalıp, bunday iygilikli jumıslar aldaǵı waqıtları da dawam etetuǵınlıǵın bildirip ótti.

Nókis mámleketlik pedagogikalıq institutı paytaxtımızdaǵı derlik hár bir máhálle menen tıǵız birge islesiwdi jolǵa qoyǵan bolıp, usı kúnge shekem máhálle jasları qatnasıwında sporttıń voleybol, basketbol, mini futbol, shaxmat-shashka túrlerinen, sonday-aq, intellektual oyınlar boyınsha birinshilikler turaqlı ótkerildi. Bunnan aldın usı jarıslarda jeńimpaz bolǵan jaslardıń Xiywa qalasına sayaxatı da shólkemlestirilgen edi.

Óz gezeginde, ata-analar, máhálle nuranıyları bunday itibar hám ǵarqorlıqlar ushın húkimetimizge, sonday-aq, institut jámáátine óz minnetdarshılıqların bildirdi.

NMPI baspasóz xızmeti.