Búgin, 5-avgust kúni Ájiniyaz atındaǵı Nókis mámleketlik pedagogikalıq institutında 2022-2023-oqıw jılında bakalavriattıń súwretlew óneri hám injenerlik grafikası tálim baǵdarına qabıllaw ushın sızıw páninen kásiplik (dóretiwshilik) imtixanlar ótkerilmekte.

Azanǵı waqıt baslanǵan imtixanǵa usı tálim baǵdarınıń kúndizgi qaraqalpaq toparına hújjet tapsırǵan abiturientler qatnastı.

Imtixan barısın baqlap barıw maqsetinde jámiyetlik shólkemler, ǵalaba xabar quralları hám siyasiy partiyalardan wákiller mirát etildi.

– Búgin muzıkalıq tálim, sonday-aq, súwretlew óneri hám injenerlik grafikası tálim baǵdarlarına ótkerilip atırǵan kásiplik (dóretiwshilik) imtixanlardı baqlap bardıq. Imtixan barısında hesh qanday nızambuzılıwshılıq, tanıs-bilisshilik jaǵdayı baqlanbadı. Barlıǵı ádil túrde ótkerilmekte. Ata-analar ushın imtixan barısın onlayn baqlap barıw imkaniyatı jaratılǵanı ashıq-aydınlıqtı támiyinlewde jaqsı qádem bolǵanlıǵın ayrıqsha atap ótkim keledi, – deydi Ózbekstan Ekologiyalıq partiyası QR Keńesi wákili Nargiza Ámetova.

Imtixanlar 9-avgustqa shekem dawam etedi.

NMPI baspasóz xızmeti.