2022-jıl 11-avgust kúni professional bilimlendiriw mákemelerine (kolledj hám texnikumlar) abiturientlerdi onlayn dizimge alıw baslandı.

Abiturientlerdi dizimge alıw Mámleketlik test orayınıń my.dtm.uz saytında «Professional bilimlendiriw mákemelerine qabıllaw» bólimi arqalı ámelge asırılmaqta.

Dizimge alıw 10-sentyabrge shekem (10-sentyabr kúni de) dawam etedi hám abiturientler kórsetilgen sánege shekem óz maǵlıwmatların ózgertiwi múmkin.

Mámleketlik test orayınıń xabar beriwinshe, joqarı oqıw orınlarınıń bakalavriat tálim baǵdarlarına kiriw test sınaqlarında qatnasqan abiturientler professional bilimlendiriw mákemelerine kiriw ushın da dizimnen ótiwi múmkin.

Bunda abiturientlerde joqarı oqıw orınlarına kiriw test sınaqlarında toplaǵan balları menen professional bilimlendiriw mákemelerine kiriw ushın tańlawda qatnasıw imkaniyatı bar.

Bunıń ushın tómendegi shártler orınlanıwı kerek:

– abiturient professional bilimlendiriw mákemesine kiriw ushın saylap atırǵan tálim baǵdarınıń pánler kompleksi hám izbe-izligi joqarı oqıw orınlarına kiriw ushın saylaǵan tálim baǵdarınıń pánler kompleksi menen birdey bolsa;
– abiturient joqarı oqıw orınlarınıń bakalavriat tálim baǵdarlarına kiriw test sınaqlarında qatnasqan bolsa;
– professional bilimlendiriw mákemelerine kiriw ushın dizimnen ótiwde usı imkaniyattan paydalanıwdı saylasa.

Eger usı shártler orınlanbasa yamasa abiturient usı imkaniyattan paydalanıwdı qálemese barlıq abiturientler sıyaqlı professional bilimlendiriw mákemelerine kiriw test sınaqlarında qatnasadı.