Búgin, 19-avgust kúni Berdaq atındaǵı Qaraqalpaq mámleketlik universitetinde Ózbekstan Respublikası Ǵárezsizliginiń 31 jıllıq bayramı múnásibeti menen «Jańa Ózbekstanda el áziz, insan áziz!» súreni tiykarında ótkerilip atırǵan mánawiyat fesitivalı sheńberinde milliy sport oyınları boyınsha jarıslar bolıp ótti. Bul haqqında universitet baspasóz xızmeti xabar berdi.

Ilajǵa Respublikalıq Ruwxıylıq hám aǵartıwshılıq orayı basshıları, elimizge belgili ádebiyat, mádeniyat hám kórkem óner ǵayratkerleri, estrada juldızları qatnastı.

Fesitival sheńberinde Berdaq atındaǵı Qaraqalpaq mámleketlik universiteti hám Ájiniyaz atındaǵı Nókis mámleketlik pedagogikalıq institutı komandaları arasında «Qazan», «Qorazlar urısı», «Arqan tartıs» hám «Láńki» oyınları boyınsha toparlıq bellesiwler shólkemlestirildi.

Milliy oyınlarda jeńimpaz bolǵan toparlar hám onda belsene qatnasqanlar Respublikalıq Ruwxıylıq hám aǵartıwshılıq orayı Qaraqalpaqstan bólimi tárepinen húrmet jarlıqları hám sport inventarları menen sıylıqlandı.