2022-jıl 18-avgust kúni Ózbekstan Respublikası Ministrler Kabinetiniń «Joqarı, orta arnawlı hám professional bilimlendiriw shólkemlerinde hayal-qızlardıń tólemli kontrakt tiykarında bilim alıwı ushın tálim kreditlerin ajıratıwdı tártipke salıw ilajları haqqında»ǵı qararı qabıl etildi. Bul haqqında ÓzA xabar berdi.

Qararǵa muwapıq, joqarı, orta arnawlı hám professional bilimlendiriw shólkemlerinde hayal-qızlardıń tólemli kontrakt tiykarında bilim alıwı ushın tálim kreditlerin ajıratıw haqqındaǵı reje tastıyıqlandı.

Usı hújjetke muwapıq, respublikadaǵı barlıq jeke menshik, sırt el hám mámleketlik joqarı, orta arnawlı hám professional bilimlendiriw shólkemleri jáne olardıń filiallarında kúndizgi, sırtqı hám keshki bilimlendiriw forması boyınsha student hayal-qızlardıń kontrakt tólemleri ushın 14 procentlik stavkada tálim kreditleri ajıratıladı.

Tálim kreditin ajıratatuǵın kommerciyalıq banklerdiń dizimi Qarjı ministrliginiń rásmiy veb-saytında járiyalanadı.

Tálim krediti kredit alıwshı tárepinen bilimlendiriw shólkemlerinde bilim beriwdiń tiyisli túri boyınsha rásmiy oqıw múddeti juwmaqlanǵannan soń jetinshi aydan baslap 7 jıl dawamında qaytarıladı.

Kredittiń procentlik tólemleri Ózbekstan Respublikası Qarjı ministrligi janındaǵı Tálim kreditlerin qarjılandırıw qorı qarjıları esabınan qaplap beriledi.

Rejege muwapıq, «Sociallıq qorǵaw birden-bir reestri»ne kirgen shańaraqlardıń hayal-qızlarına ajıratılatuǵın tálim krediti boyınsha girew hám kepillik talap etilmeydi.

Tálim kreditleri Ózbekstan Respublikası puqarası bolǵan respublikadaǵı barlıq joqarı, orta arnawlı hám processional bilimlendiriw shólkemlerinde (Ózbekstan Respublikası aymaǵındaǵı sırt el, mámleketlik, mámleketlik emes, joqarı, orta arnawlı hám professional bilimlendiriw shólkemleri, olardıń filiallarında), sonıń ishinde, qospa tálim baǵdarlamaları boyınsha bakalavriat, magistraturanıń kúndizgi, sırtqı hám keshki bilimlendiriw formasında tólemli kontrakt tiykarında oqıwǵa qabıl etilgen yamasa usınıs etilgen, oqıwın kóshirgen, mámleketlik joqarı oqıw orınlarınıń magistratura basqıshında tólemli kontrakt tiykarında oqıp atırǵan student hayal-qızlardıń kontrakt tólemlerin qaplaw ushın mámleketlik byudjetten ajıratılatuǵın limit sheńberinde qarjılar jeterli bolmaǵan jaǵdaylarda, sonday-aq, kontrakt tólemleri qaplap berilmegen student hayal-qızlarǵa ajıratıladı.

Bunda kredit alıwshınıń turaqlı dáramat dáregine iye bolǵan shańaraq aǵzaları (ata-anası, aǵa-inisi, apa-sińlisi, ómirlik joldası) yamasa úshinshi tárep birgelikte qarız alıwshı sıpatında tálim krediti shártnamasında qatnasıwı múmkin.

NMPI baspasóz xızmeti.