Búgin, 10-sentyabr kúni Ájiniyaz atındaǵı Nókis mámleketlik pedagogikalıq institutında jaslar tárbiyasınıń áhmiyetli máselelerine arnalǵan jıynalıs bolıp ótti.

Ilajǵa fakultet dekanlarınıń jaslar máseleleri boyınsha orınbasarları, profilaktikalıq inspektorlar, psixologlar, pedagog-tárbiyashılar hám tyutorlar qatnastı.

Jıynalıstı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp bardı.

Onda jańa oqıw jılında student-jaslar qatnasıwında ótkeriletuǵın hár qıylı ilajlar, olardıń bos waqıtların mazmunlı ótkeriw hám jaslar arasında salamat sociallıq-ruwxıy ortalıqtı qáliplestiriw baǵdarında ámelge asırılatuǵın jumıslar keń túrde dodalandı.

Ilajda studentler menen tıǵız birge islesiw, olardıń pikir-usınısları, mashqalaların úyreniw, olarǵa sheshim tabıw, fakultetlerde jaslar jetekshileri hám studentler keńesiniń jetekshilerin saylaw, jaslarǵa baylanıslı mámleketlik siyasat, Prezidenttiń usı baǵdarda qabıl etilgen qararları, pármanlarınıń mazmunı hám áhmiyetin túsindiriw, studentler turaq jayında jasaytuǵın studentler ushın barlıq sharayatlardı jaratıw, bes baslama dógerekleri, málimleme-resurs orayınan paydalanıwı ushın qosımsha imkaniyatlardı islep shıǵıw, sonıń menen birge, ishki tártip-qaǵıydalar, etikalıq qaǵıydalarǵa ámel etiwin qadaǵalaw boyınsha tiyisli juwapkerlerge anıq tapsırmalar berildi.

Sonday-aq, jıynalısta ijarada jasaytuǵın studentler halınan turaqlı xabar alıw, olardıń ijaradaǵı úylerindegi sharayatlar, imkaniyatlardı úyreniw, ijarada jasaytuǵın studentler bazasın qáliplestiriw máseleleri sóz bolıp, bul boyınsha aldaǵı islenetuǵın jumıslar belgilep alındı.

Jıynalısta instituttıń ruwxıy-aǵartıwshılıq bólimi baslıǵı B.Bekmuratov hám profilaktikalıq inspektorı, kapitan B.Masharipovlar shıǵıp sóylep, joqarıdaǵı atap ótilgen máseleler boyınsha jańa mexanizmlerden paydalanıw haqqında usınısların bildirdi.

Ilajda atap ótilgen máseleler boyınsha aylıq monitoring hám reyting bahalaw jumısları alıp barılatuǵınlıǵı atap ótildi.

NMPI baspasóz xızmeti.