Ájiniyaz atındaǵı Nókis mámleketlik pedagogikalıq institutında studentlerdiń bos waqıtların mazmunlı ótkeriw, olardı sport hám salamatlıq ilajlarına qamtıp alıw, sport sheberligine iye jaslardı múnásip xoshametlew hám qollap-quwatlaw, sonıń menen birge, instituttıń saylandı komandaları ushın sportshılar rezervin qáliplestiriw maqsetinde student-jaslar arasında kishi olimpiada esaplanǵan «Universiada-2022» sport jarısları turaqlı shólkemlestirilip kelinbekte.

Atap aytqanda, sporttıń voleybol, basketbol, gandbol hám mini futbol túrleri boyınsha jarıslar instituttıń sport klubı tárepinen belgilengen joba tiykarında 7-12-sentyabr kúnleri aralıǵında ótkerildi.

Ótkerilgen jarıslarǵa instituttıń barlıq fakultetlerinde oqıp atırǵan 1-kurs studentlerinen dúzilgen komandalar qatnasıp, ózleriniń sport sheberlikleri hám tayarlıqların sınaqtan ótkerdi.

Mini futbol boyınsha ótkerilgen jarısta Dene mádeniyatı fakulteti komandası jeńimpazlıqtı qolǵa kirgizdi. 2-orındı Fizika-matematika hám 3-orındı Tábiyǵıy pánler fakultetleriniń komandaları iyeledi.

Jarıs jeńimpazları hám sıylı orın iyeleri instituttıń sport klubı tárepinen diplom hám medallar menen sıylıqlandı.

Maǵlıwmat ornında atap ótiw kerek, «Universiada» sport jarıslarında Nókis mámleketlik pedagogikalıq institutı studentleri joqarı nátiyjelerdi qolǵa kirgizip kelmekte. Atap aytqanda, 2020-jılı ótkerilgen jarıstıń respublikalıq final basqıshlarında institut studentleri 12 altın, 8 gúmis hám 12 bronza medalın qolǵa kirgizip, 80 million sumlıq sport inventarlarınan ibarat Prezident sawǵasına múnásip dep tabılǵan edi.

Institutta sport jarısları dawam etpekte.

NMPI baspasóz xızmeti.