Búgin, 20-sentyabr kúni Ájiniyaz atındaǵı Nókis mámleketlik pedagogikalıq institutında Ózbekstan Respublikası Ministrler Kabineti janındaǵı Joqarı attestaciyalıq komissiyasınıń baslıǵı Ahmadbek Yusupov penen ushırasıw bolıp ótti.

Ushırasıwǵa institut tayanısh doktorantları, doktorantlar, erkin izleniwshiler, institut janındaǵı ilimiy dárejeler beriwshi ilimiy keńes aǵzaları, kafedra baslıqları, professor-oqıtıwshılar hám ilimiy-izertlew jumısları menen shuǵıllanıp atırǵan jaslar qatnastı.

Ilajdı institut rektorı B.Otemuratov ashıp berdi.

Izleniwshiler menen ashıq sáwbetlesiw tárizinde ótken ushırasıwda atap ótilgenindey, sońǵı jıllarda mámleketimizde, sonıń ishinde, Qaraqalpaqstanda ilimdi rawajlandırıw, ilimiy izleniw alıp barıw niyetinde bolǵan jaslardı hár tárepleme qollap-quwatlaw baǵdarında Prezidentimiz basshılıǵında alıp barılıp atırǵan jumıslardıń áhmiyeti jáne nátiyjeleri úlken bolmaqta.

Atap aytqanda, Prezidentimizdiń pármanına muwapıq, Qaraqalpaqstandaǵı zárúrlikten kelip shıǵıp, ekologiya, awıl xojalıǵı, irrigaciya, qurılıs tarawlarında tayanısh doktoranturada qosımsha kadrlar tayarlawdıń jolǵa qoyılıwı joqarıdaǵı gápimizdiń ayqın dálili bolıp tabıladı.

JAK baslıǵı házirgi waqıtta Qaraqalpaqstandaǵı joqarı oqıw orınları menen ilimiy-izertlew oraylarında 12 ilimiy keńestiń jumıs alıp barıp atırǵanın atap ótip, búgin ilimiy izleniwshiler menen ashıq túrde sáwbetlesip, olardıń mashqalaların úyrenip, pikir-usınısların tıńlaw niyetinde ekenligin málim etti.

Ushırasıwda prorektor M.Jalelov, professorlar K.Allambergenov, Ó.Álewov, T.Ótebaev, docentler A.Pazılov, A.Kamalov hám tayanısh doktorantlar, doktorantlar, sonday-aq, erkin izleniwshiler ilimiy-izertlew jumısların jetilistiriw, izertlew boyınsha maqalalar járiyalaw, jumıstı rásmiylestiriw, daǵazalaw, joybarlarda qatnasıw, seminarlardı shólkemlestiriw tártibi, ilimiy-izertlew jumısın ámeliyatqa engiziw, antiplagiatqa tekseriw procesi, docentlik, professorlıq dárejelerin alıw menen baylanıslı ózleriniń pikir-usınısların bildirip, usı basqıshlardaǵı orın alıp atırǵan mashqalaların atap ótti.

Professor Keńesbay Allambergenov JAK baslıǵı A.Yusupovtıń bunnan aldınǵı institutta ilimiy izleniwshiler menen bolǵan usınday ashıq sáwbetlesiwlerinde Qaraqalpaqstanda folkloristika boyınsha seminar shólkemlestiriw máselesin kótergenligi hám bul boyınsha bir aydan soń unamlı juwap kelip, házirgi waqıtta usı seminar joqarı nátiyjeler menen jumıs alıp barıp atırǵanın málim etip, endi búgingi kúnde institutta usı baǵdar boyınsha óz aldına ilimiy keńes shólkemlestiriw boyınsha usınıs bildirdi. Bunıń ushın ilimiy hám basqa da zárúr bolǵan tiykarlar jeterli ekenligin kórsetip ótti.

JAK baslıǵı ushırasıwda atap ótilgen barlıq máseleler boyınsha óz juwmaqların, jol-jobaların bildirip, professor K.Allambergenovtıń, sonday-aq, basqa da bildirilgen pikir-usınıslar boyınsha tiyisli jumıslar alıp barılatuǵınlıǵın málim etti.

Ushırasıwda ilimiy izleniwshiler ózleriniń sorawlarına tolıq juwaplar aldı.

NMPI baspasóz xızmeti.