Ájiniyaz atındaǵı Nókis mámleketlik pedagogikalıq institutında gúz-qıs máwsiminde studentler arasında gaz iysinen záhárleniwdiń aldın alıw, bul baǵdarda túsindiriw hám úgit-násiyat jumısların alıp barıw maqsetinde Ayrıqsha jaǵdaylar basqarmasınıń wákilleri menen ushırasıw bolıp ótti.

Ilajǵa Nókis qalalıq Ayrıqsha jaǵdaylar bóliminen kapitan R.Raximbaev, aǵa serjant P.Qurbanov, fakultet dekanlarınıń orınbasarları, profilaktikalıq inspektorlar, tyutorlar hám student-jaslar qatnastı.

Ushırasıwdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp bardı.

Ilajda taraw qánigeleri tárepinen atap ótilgenindey, respublikamızda gaz iysinen záhárleniwdiń aldın alıw, órt qáwipsizligi qaǵıydalarına ámel etiw, sonday-aq, sociallıq taraw obektleri, kóp qabatlı hám jeke tártiptegi turaq jaylardıń jılıtıw qazanları, olardıń morıların gúz-qıs máwsimine tayarlaw maqsetinde qala hám rayonlar kesiminde jámiyetlik baslamada arnawlı toparlar shólkemlestirildi. Paytaxtımız Nókis qalasınıń ózinde 5 sektorǵa bólingen halda Ayrıqsha jaǵdaylar basqarmasınıń qánigeleri tárepinen úyreniw hám monitoring jumısları alıp barılmaqta.

Sońǵı jıllarda xalqımız arasında qáwipsizlik talaplarına juwap bermeytuǵın qolbala, standart bolmaǵan gaz úskeneleri, nasaz jaǵdaydaǵı jılıtıw qazanları jáne morılardan paydalanıw aqıbetinde gaz iysinen záhárleniw jaǵdayları júz bermekte.

Ásirese, kóp qabatlı turaq jaylarda ijarada jasaytuǵın joqarı oqıw orınlarınıń studentleri arasında júz berip atırǵan usınday unamsız aqıbetler taraw juwapkerleri tárepinen kún tártibindegi áhmiyetli másele sıpatında bahalanbaqta.

Ushırasıwda studentlerdiń ijarada jasap atırǵan úylerinde taraw qánigeleri menen birge monitoring jumısların alıp barıw, atap aytqanda, úyreniw jumıslarınıń juwmaqları boyınsha ijara úylerin qızıl, sarı hám jasıl kategoriyalarǵa ajıratqan halda tiyisli juwapkerlerge maǵlıwmatlar beriw, anıqlanǵan kemshilikler hám mashqalalardı saplastırıw boyınsha anıq belgilengen ámeliy jumıslardı alıp barıw, jaslar arasında túsindiriw hám úgit-násiyat jumıslarınıń nátiyjeli variantların ámeliyatqa engiziw máseleleri sóz etilip, bul baǵdarda institut hám Ayrıqsha jaǵdaylar basqarması qánigeleri menen birgelikte ámelge asırılatuǵın jumıslar belgilep alındı.

NMPI baspasóz xızmeti.