Ájiniyaz atındaǵı Nókis mámleketlik pedagogikalıq institutınıń kishi májilisler zalında ádebiyattanıw iliminiń pidayısı, ádebiyatshı, sınshı alım Ábdikerim Pirnazarovtıń «Ájiniyaztanıw ilimi» atlı kitabınıń tanıstırıw keshesi bolıp ótti.

Kesheni jaslar máseleleri hám ruwxıy-aǵartıwshılıq isleri boyınsha birinshi prorektor Q.Qodirov ashıp berdi hám basqarıp bardı.

Keshege institut professor-oqıtıwshıları, belgili ilimpazlar, ádebiyattanıwshı alımnıń tuwǵan-tuwısqanları, jaqınları hám student-jaslar qatnastı.

Ilimpaz benen ustaz-shákirt tutınǵan institut professorları K.Allambergenov, Yu. Ibragimov, filologiya ilimleriniń doktorı G.Qurbaniyazov onıń ilimiy miynetlerinen tısqarı joqarı adamgershilik pazıyletleri haqqında da toqtaldı. Filologiya ilimleriniń doktorı Z.Bekbergenova hám filologiya ilimleri boyınsha filosofiya doktorı Q.Mámbetov ilimpazdıń ilimiy miyrası, onıń qaraqalpaq ádebiyatındaǵı áhmiyeti haqqında bayanatlar jasadı.

Ábdikerim Pirnazarov qısqa ómiri dawamında qaraqalpaq klassik ádebiyatınıń kórnekli wákili Ájiniyaz Qosıbay ulınıń poeziyalıq shıǵarmaların tereń úyrenip, ádebiyattanıw iliminiń rawajlanıwına óziniń salmaqlı úlesin qostı. Ásirese, onıń Ájiniyaz shıǵarmalarına baǵıshlanǵan birneshe kólemli ilimiy miynetleri bul baǵdardaǵı dáslepki kólemli metodika bolıp xızmet etti.

Á.Pirnazarov tek ǵana qaraqalpaq filologiyasınıń emes, sonıń menen birge, ózbek filologiyasınıń da ilimiy jaqtan izertleniwi, ádebiy baylanıslardıń rawajlanıwı ushın ayanbay miynet etti.

Alımnıń «Jas óspirimlerdi miynetkesh, gúressheń, talantlı etip tárbiyalaw oǵada qıyın jumıs. Biraq, bul tek ǵana ádebiyattıń qolınan keledi. Bunıń ushın ádebiyat ádebiyattay bolıp oqıtılıwı kerek» degen danalıq pikirleri tek ǵana ózi jasaǵan dáwir ushın emes, sonıń menen birge, búgingi kúni de óz áhmiyetin joǵaltpaǵan, kúnniń baslı máseleleriniń biri bolıp tabıladı.

Keshede ilimpazdıń tuwǵan-tuwısqanları da sózge shıǵıp, onıń ómir jolı, insanıylıq qásiyetlerin eske aldı.

Keshe sońında kitaptı baspaǵa tayarlaǵan ilimpazdıń qarındası Á.Jálimova institut kitapxanasına jańa kitaptan birneshe danasın sawǵa etti.

Allayar Darmenov,

NMPI oqıtıwshısı.