Ájiniyaz atındaǵı Nókis mámleketlik pedagogikalıq institutında Qaraqalpaqstan Respublikası aymaqlıq innovaciyalıq rawajlanıw basqarması hám «Jas alımlar akademiyası» jámiyeti wákilleri menen ushırasıw bolıp ótti.

Ilajǵa institut professor-oqıtıwshıları, tayanısh doktorantlar, doktorantlar, erkin hám stajyor izleniwshiler, ilimiy-izertlew jumısları menen shuǵıllanıp atırǵan jaslar qatnastı.

Ushırasıwdı instituttıń ilimiy isler hám innovaciyalar boyınsha prorektorı M.Jalelov basqarıp bardı.

Ilajda Qaraqalpaqstan Respublikası aymaqlıq innovaciyalıq rawajlanıw basqarması qánigesi E.Abdiganiev, «Jas alımlar akademiyası» jámiyeti direktorı S.Rustamova, Jaslar texnoparki qánigesi T.Aymuratovalar búgingi kúnde elimizde ilimdi rawajlandırıw, jas ilimpazlardı hár tárepleme qollap-quwatlaw, olarǵa múnásip sharayatlar jaratıp beriw baǵdarında alıp barılıp atırǵan jumıslardıń nátiyjeliligi, sonıń menen birge, Ózbekstan Respublikası Prezidentiniń «BMSh Bas Assambleyasınıń 2021-jıl 18-maydaǵı «Aralboyı regionın ekologiyalıq innovaciyalar hám texnologiyalar aymaǵı dep járiyalaw haqqında»ǵı arnawlı Rezolyuciyasın ámelge asırıw ilajları haqqında»ǵı qararınıń mazmunı jáne áhmiyeti jóninde jıynalǵanlar menen pikir almastı.

NMPI baspasóz xızmeti.