Ájiniyaz atındaǵı Nókis mámleketlik pedagogikalıq institutınıń Pedagogika, Fizika-matematika, Súwretlew óneri hám texnologiyalıq tálim, sonday-aq, Tariyx fakultetlerinde Korrupciyaǵa qarsı gúresiw «Komplaens qadaǵalaw» sistemasın basqarıw bólimi tárepinen student-jaslar arasında salamat sociallıq ortalıqtı bekkemlew, korrupciyalıq jaǵdaylardıń aldın alıw máselelerine baǵıshlanǵan ushırasıw hám úgit-násiyat jumısları ámelge asırıldı.

Hámmemizge málim, korrupciya jámiyet hám mámleket qáwipsizligi ushın eń qáwipli illetlerdiń biri bolıp, sociallıq baǵdarlanǵan bazar ekonomikasına tiykarlanǵan demokratiyalıq huqıqıy mámleketlik jáne puqaralıq jámiyetiniń barlıq salalarında – mámleketlik basqarıw hám jámiyetlik tarawlarda da ushırasıwı tábiyǵıy.

Elimizde korrupciyaǵa qarsı gúresiw baǵdarında áhmiyetli shólkemlestiriw-huqıqıy reformalardı ámelge asırıw mámleketlik siyasattıń baslı baǵdarlarınıń biri bolıp tabıladı.

Ásirese, bul baǵdarda xalıqtıń, sonıń ishinde, jaslardıń huqıqıy sanası hám huqıqıy mádeniyatın jetilistiriw, jámiyette korrupciyaǵa qarsı mawasasız qarım-qatnastı qáliplestiriw búgingi kúnniń baslı wazıypası bolıp esaplanadı.

Korrupciya bul mámlekette ekonomikanı ele de rawajlandırıwǵa, xalıqtıń abadanlıǵın arttırıwǵa, mámlekette investiciyalıq ortalıqtı jaqsılawǵa – ulıwmalastırıp aytqanda hár qanday rawajlanıw baǵdarı ushın tosıq bolıp turǵan faktorlardıń biri esaplanadı.

Ótkerilgen ushırasıwlarda instituttıń Korrupciyaǵa qarsı gúresiw «Komplaens qadaǵalaw» sistemasın basqarıw bólimi baslıǵı Palmurza Xojabekov, bólim qánigeleri tárepinen studentler, professor-oqıtıwshılar, tyutorlar, fakultet dekanatı wákillerine korrupciyalıq jaǵdaylardıń aldın alıw baǵdarında ámelge asırılıp atırǵan jumıslar boyınsha tolıq maǵlıwmatlar berildi.

Atap aytqanda, bólimniń isenim telefonı, Telegram tarmaǵındaǵı múrájatlar bot mánzili boyınsha kelip túsip atırǵan pikir, usınıslar hám múrájatlardan kelip shıǵıp, qatnasıwshılarǵa korrupciyalıq háreketlerdiń mazmunı hám olarǵa belgilengen nızamlı sharalar haqqında túsindiriw jumısları alıp barıldı.

Bunday mazmundaǵı ilajlar institut kóleminde barlıq fakultetlerde ótkerilmekte.

NMPI Korrupciyaǵa qarsı gúresiw «Komplaens qadaǵalaw» sistemasın basqarıw bólimi.