Aldın xabar bergenimizdey, Ájiniyaz atındaǵı Nókis mámleketlik pedagogikalıq institutınıń barlıq fakultetleri kesiminde instituttıń Korrupciyaǵa qarsı gúresiw «Komplaens qadaǵalaw» sistemasın basqarıw bólimi wákilleri menen ushırasıwlar hám úgit-násiyat jumısları alıp barılmaqta.

Túrkiy tiller, Dene mádeniyatı, Tábiyǵıy pánler, Baslawısh tálim, Shet tilleri fakultetlerinde ótkerilgen usınday ilajlarda Korrupciyaǵa qarsı gúresiw «Komplaens qadaǵalaw» sistemasın basqarıw bóliminiń baslıǵı Palmurza Xojabekov tárepinen mámleket hám jámiyettiń rawajlanıwına keri tásir etetuǵın korrupciyalıq háreketlerdiń unamsız aqıbetleri hám olardıń aldın alıw boyınsha studentlerge keń túrde túsinikler berildi.

Korrupciya atamasınıń ózi latın tilinen alınǵan bolıp, «para berip, satıp alıw, buzılıw, isten shıǵıw, ruwxıy jaqtan buzılıw» degendi ańlatadı. Ádette lawazımlı adamlar tárepinen oǵan berilgen lawazım wákillikleri hám huqıqlardan, sonday-aq, sonıń menen baylanıslı rásmiy status dárejesinen, imkaniyatlar jáne baylanıslardan ózleriniń jeke máplerin gózlep nızamshılıq hám etikalıq qaǵıydalarǵa qayshı túrde paydalanıwın ańlatadı.

«Korrupciyaǵa qarsı gúresiw haqqında»ǵı nızamda korrupciya – adamnıń óz lawazımı yamasa xızmet statusınan jeke máplerin yamasa ózge adamlardıń máplerin gózlep, materiallıq yaki materiallıq emes máp alıw maqsetinde nızamǵa qayshı ráwishte paydalanıwı, usı sıyaqlı, bunday mápti nızamǵa qayshı túrde usınıw dep táriyp berilgen.

Atap ótiw kerek, korrupciyaǵa baylanıslı huqıqbuzarlıqlarǵa qarsı belsendi gúresiwlerge qaramastan, ol globallıq mashqalaǵa aylandı. Bul túsinik BMShnıń Korrupciyaǵa qarsı konvenciyasın qabıllawǵa tiykar boldı. Konvenciyaǵa muwapıq, korrupciya endi jergilikli mashqala emes, al barlıq mámleketlerdiń jámiyeti hám ekonomikasına tásir kórsetetuǵın transmilliy hádiysege aylandı, sonday-aq, korrupciyanıń aldın alıw hám joq etiw barlıq mámleketlerdiń wazıypası bolıp tabıladı.

Jámiyette korrucpiya ápiwayı xalıq wákilleriniń joqarı hámeldarlarǵa yamasa mámleketlik hámeldarlardıń óz ara bir-birine bolǵan qarım-qatnasınan kelip shıǵadı. Bunday unamsız jaǵdaydıń hár qanday kórinisi jámiyetti daǵdarıs bosaǵasına alıp kelip qoyadı.

Ótkerilgen ushırasıwlarda korrupciyanıń hár qanday kórinisleriniń aldın alıw ushın hár birimiz huqıqıy jaqtan bilim hám kónlikpelerge iye bolıwımız, ásirese, jaslardıń huqıqıy mádeniyatı joqarı dárejede bolıwı kerekligi, sonıń menen birge, átiraptaǵı júz berip atırǵan waqıyalarǵa biypárwa bolmastan, bárqulla itibarlı hám sergek bolıw zárúrligi haqqında sóz boldı.

Ushırasıwlar dawamında bólim tárepinen 9-dekabr – Xalıqaralıq korrupciyaǵa qarsı gúresiw kúnine baǵıshlanǵan hár qıylı tańlawlar ótkeriletuǵınlıǵı hám olarǵa student-jaslardıń belsene qatnasıwı úlken áhmiyetke iye bolatuǵınlıǵı atap ótildi.

Studentler ushırasıwlar barısında ózlerin qızıqtırǵan sorawlarına juwaplar aldı.

NMPI Korrupciyaǵa qarsı gúresiw «Komplaens qadaǵalaw» sistemasın basqarıw bólimi.