Aldın xabar bergenimizdey, Ájiniyaz atındaǵı Nókis mámleketlik pedagogikalıq institutı 2022-2023-oqıw jılı ushın Malayziyanıń Lincoln University College oqıw ornı menen birgelikte bakalavriattıń «60110200 – Mektepke shekemgi tálim» kúndizgi bilimlendiriw baǵdarı boyınsha qospa tálim (Double Degree) baǵdarlamasına abiturientlerden hújjetlerdi qabıllaǵan edi.

Búgin, 20-oktyabr kúni qospa tálim baǵdarlamasına hújjet tapsırǵan abiturientlerge ana tili hám ádebiyatı hám biologiya pánlerinen test sınaqları bolıp ótti.

Institut tariyxında birinshi márte jolǵa qoyılıp atırǵan usı qospa tálim baǵdarlaması Ózbekstan Respublikası Prezidentiniń «Ózbekstan Respublikası joqarı bilimlendiriw sistemasın 2030-jılǵa shekem rawajlandırıw koncepciyasın tastıyıqlaw haqqında»ǵı hám «Joqarı hám orta arnawlı bilimlendiriw sistemasın basqarıwdıń jańa principlerin engiziw ilajları haqqında»ǵı qararlarında belgilengen wazıypalardan kelip shıǵıp, sonday-aq, Ózbekstan Respublikası hám sırt ellerdiń joqarı bilimlendiriw shólkemleriniń óz ara birge islesiwi boyınsha «Qospa tálim baǵdarlaması» tiykarında ámelge asırılmaqta.

Dúnya júziniń abıroylı reyting shólkemleri tárepinen «TOP-300»lik joqarı oqıw orınları qatarına kirgizilgen Lincoln University College oqıw ornı menen birgelikte jolǵa qoyılıp atırǵan qospa tálim baǵdarlaması bakalavriattıń «60110200 – Mektepke shekemgi tálim» kúndizgi bilimlendiriw baǵdarı boyınsha tólemli kontrakt tiykarında ámelge asırıladı. Bunda oqıw múddeti 3 jıl bolıp (bir yarım jıl institutta, qalǵan bir yarım jılı Malayziyada dawam ettiriledi), oqıw procesi tolıq inglis tilinde alıp barıladı.

NMPI baspasóz xızmeti.