21-oktyabr – Ózbek tili bayramı kúni. Bıyıl ózbek tiline mámleketlik til biyliginiń berilgenine 33 jıl tolmaqta. Sáne múnásibeti menen Ájiniyaz atındaǵı Nókis mámleketlik pedagogikalıq institutında «Qádiriń bálent bolsın, ana tilim!» atamasında ilimiy-ámeliy konferenciya hám bayram koncerti shólkemlestirildi.

Konferenciyanı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov ashıp berdi hám basqarıp bardı.

Ilajǵa belgili filolog ilimpazlar, professor-oqıtıwshılar, tyutorlar, student-jaslar, birge islesiwshi ulıwma bilim beriw mektepleriniń muǵallimleri hám oqıwshıları, keń jámiyetshilik hám ǵalaba xabar quralları wákilleri qatnastı.

Konferenciyada filologiya ilimleriniń doktorı, ózbek tili kafedrasınıń docenti G.Qurbaniyazov, qaraqalpaq tili kafedrasınıń docenti G.Patullaeva, Qaraqalpaqstan jazıwshılar awqamınıń aǵzası, belgili nawayıtanıwshı shayır Á.Ótepbergenov, Nókis qalasındaǵı 3-sanlı ulıwma bilim beriw mektebiniń ózbek tili hám ádebiyatı páni muǵallimi F.Ruzimbetovalar sózge shıǵıp, «Til – ruwxıylıq aynası», «Ana tilin milliy baǵdarlama tiykarında oqıtıwdıń áhmiyeti», «Sen millet maqtanıshısań, ana tilim» atamalarındaǵı bayanatların oqıp berdi.

Bunnan sarras 33 jıl burın, yaǵnıy 1989-jılı 21-oktyabr kúni «Mámleketlik til haqqında»ǵı nızam qabıl etilip, ózbek tiline mámleketlik til biyligi berilgen edi.

2019-jıldan berli Ózbekstan Respublikası Prezidentiniń «Ózbek tiliniń mámleketlik til sıpatındaǵı abıroyı hám mártebesin túp-tiykarınan arttırıw ilajları haqqında»ǵı pármanına muwapıq, respublikamızda 21-oktyabr – Ózbek tili bayramı kúni sıpatında keń túrde belgilenip kelinbekte.

Ózbekstan Respublikası Prezidenti Shavkat Mirziyoyevtiń xalqımızǵa bayram qutlıqlawında keltirip ótkenindey, sońǵı jıllarda elimizde ózbek tilin rawajlandırıw, onıń turmısımızdaǵı ornı hám tásirin arttırıw boyınsha jańa basqısh baslandı.

Atap aytqanda, 21-oktyabr – Ózbek tili bayramı kúni dep belgilengeni umıtılmas, tariyxıy waqıyaǵa aylandı. Mámleketlik tildiń abıroyı hám mártebesin arttırıwǵa baǵdarlanǵan párman hám qararlar, normativlik hújjetler qabıl etildi. Bul baǵdarda 2020-2030-jıllarǵa mólsherlengen koncepciya hám ayrıqsha baǵdarlama turmısqa engizilmekte.

Qısqa waqıttıń ishinde bes tomlıq «Ózbek tiliniń túsindirme sózligi», onnan aslam tarawǵa baylanıslı terminler sózlikleri, otız tomlıq «Ǵárezsizlik dáwiri ózbek nawayıtanıwshılıǵı» izertlewler kompleksi jaratıldı.

Usı kúnleri ózbek tilinde «Túrkiy ádebiyat dúrdanaları» atamasındaǵı júz tomlıq kólemli toplam baspadan shıǵıp atırǵanlıǵı, belsendi hám qábiletli jaslarımızdıń háreketleri menen Internet tarmaǵındaǵı ózbekshe maǵlıwmatlardıń elektron bazası bayıtılıp atırǵanlıǵın atap ótiw orınlı.

Konferenciyada bayanatshılar hám sózge shıǵıwshılar tárepinen ózbek tiliniń dúnya tilleri arasındaǵı abıroyın arttırıw, elimizde mámleketlik til sıpatındaǵı mártebesin, qollanılıwın bunnan bılay da jetilistiriw, filologiya baǵdarında jańa baǵdarlarda ilimiy-izertlew jumısların alıp barıw maqsetinde aldaǵı waqıtlarda ámelge asırılatuǵın jumıslar haqqında da pikirler bildirildi.

Ilaj instituttıń Túrkiy tiller fakultetiniń qábiletli studentleriniń atqarıwındaǵı bayram koncerti menen dawam etti.

NMPI baspasóz xızmeti.