Ájiniyaz atındaǵı Nókis mámleketlik pedagogikalıq institutında ullı oyshıl hám enciklopedist alım Ábiw Rayxan Beruniydiń 1050 jıllıǵına baǵıshlanǵan «Ábiw Rayxan Beruniy miyrası hám házirgi zaman civilizaciyasınıń rawajlanıwı» atamasındaǵı ilimiy seminar bolıp ótti.

Xabarıńız bar, Ózbekstan Respublikası Prezidentiniń «Ullı oyshıl hám enciklopedist alım Ábiw Rayxan Beruniy tuwılǵanınıń 1050 jıllıǵın xalıqaralıq kólemde keń túrde belgilew haqqında»ǵı qararı qabıl etilgen edi. Qararǵa muwapıq, 2022-2023-oqıw jılında ullı oyshıl hám enciklopedist alım Ábiw Rayxan Beruniy tuwılǵanınıń 1050 jıllıǵı YUNESKO qáwenderliginde xalıqaralıq kólemde keń túrde belgilenetuǵınlıǵı belgilep qoyıldı.

Usı qararda belgilengen wazıypalardan kelip shıǵıp, instituttıń Jámiyetlik pánler kafedrasınıń baslıǵı, tariyx ilimleriniń doktorı Yaxshibeka Abdullaeva basshılıǵında shólkemlestirilgen ilimiy seminarda alımnıń ilimiy-aǵartıwshılıq miyrasların bunnan bılay da tereń úyreniw hám keń túrde úgit-násiyatlaw máseleleri dodalandı.

Ilajda «Beruniy áwladları» jámiyetlik fondı hám onıń janındaǵı Beruniytanıw ilimiy orayı wákilleri sózge shıǵıp, ullı enciklopedist alımnıń ilimiy miynetlerin úyreniw máseleleriniń áhmiyetine toqtalıp, seminar shólkemlestiriwshilerine minnetdarshılıq bildirdi.

Ilimiy seminarda Ózbekstan Ilimler akademiyası Shıǵıstanıw institutı, Imam Buxariy xalıqaralıq ilimiy-izertlew orayı, Ilimler akademiyası V.I.Romanovskiy atındaǵı Matematika institutı, Ózbek tili, ádebiyatı hám folklorı institutı, Nókis kánshilik institutı, sonday-aq, Nókis mámleketlik pedagogikalıq institutınan bir qatar alımlar, professorlar Ábiw Rayxan Beruniydiń dúnya civilizaciyasınıń rawajlanıwına qosqan úlesi, matematika, fizika, astronomiya, geografiya, geologiya, tariyx hám etnografiya ilimleriniń rawajlanıwında alımnıń jazǵan ilimiy miynetleriniń áhmiyeti, búgingi kúnniń iliminde Beruniy miyraslarınıń tutqan ornı haqqındaǵı bayanatları tıńlandı.

Ilajda Beruniydiń ilimiy-aǵartıwshılıq miyrasların keleshek áwladlarǵa jetkeriw, jaslar arasında úgit-násiyat jumısların alıp barıw, alımnıń bizge shekem jetip kelgen shıǵarmaların bunnan bılay da tereń úyreniw máseleleri dodalanıp, aldaǵı wazıypalar belgilep alındı.

NMPI baspasóz xızmeti.