Ájiniyaz atındaǵı Nókis mámleketlik pedagogikalıq institutında filologiya ilimleriniń doktorı, professor Karimbay Qurambaevtıń 80 jıllıǵı múnásibeti menen «Ádebiy baylanıslar hám xalıqlar doslıǵınıń pidayısı» atamasındaǵı eslew keshesi bolıp ótti.

Ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp bardı.

Eslew keshesinde Ózbekstan xalıq jazıwshısı, Qaraqalpaqstan xalıq shayırı, Qaraqalpaqstan Jazıwshılar awqamınıń baslıǵı K.Kárimov, Qaraqalpaqstan xalıq shayırı, senator G.Matyoqubova, qaraqalpaq ádebiyatı kafedrasınıń baslıǵı, filologiya ilimleriniń doktorı, professor K.Allambergenov, ózbek ádebiyatı kafedrasınıń docenti, filologiya ilimleriniń kandidatı K.Tashanov hám basqalar sózge shıǵıp, qaraqalpaq, ózbek hám túrkmen ádebiyatınıń dúrdanaları boyınsha ilimiy-izertlew jumısların alıp barǵan, óz ómirin usı xalıqlardıń ádebiy baylanısların tereń úyreniwge baǵıshlaǵan ustaz Karimbay Qurambaevtıń ómiri, ilimiy-pedagogikalıq jumısları haqqındaǵı bayanatların jasadı.

– Omar Hayyam «Ómirde hár bir nárseniń juwmaǵı bar: muhabbattıń da, doslıqtıń da, azaptıń da aqırı boladı. Tek ǵana bir nárseniń – eslewdiń aqırı bolmaydı» degen edi, – dedi docent K.Tashanov. – Búgingi eslew keshesinde K.Qurambaevtıń aǵıslı dáryaǵa megzes ómir jolı, onıń ájayıp, sawaplı isleri eske alınbaqta. Ol óziniń ana jurtına hám jasap atırǵan eline pidayı xızmet etken insan edi.

Ilajda atap ótilgenindey, professor K.Qurambaev ádebiyattanıwdıń áhmiyetli tarawlarınıń biri – milliy ádebiyatlardıń óz ara baylanısları hám dóretiwshilik tásiri máselesi menen shuǵıllandı. Ásirese, ózbek ádebiyatınıń Oraylıq Aziya xalıqları ádebiyatları menen ádebiy baylanısları boyınsha ilimiy jurnallarda 300 den aslam maqalalar hám birneshe monografiyalardı járiyaladı. Atap aytqanda, «Xidir Deryaev», «Oʻzbek-turkman adabiy aloqalari», «Mahtumquli she’riyati Oʻzbekistonda», «Adabiy ta’sirdan ijodiy oʻziga xoslikka», «Tarjima va tarjimon mas’uliyati», «Adabiy jarayon, ijod mas’uliyati, adabiy aloqalar», «Mahtumquli – ilhom chashmasi», «Gul bor Guliston ichinda», «Navoiyning ijod boʻstonidan ilhomlanib…» sıyaqlı monografiyaları baspadan shıqtı. Sonday-aq, alımnıń qaraqalpaq, rus hám túrkmen tillerindegi «Hamza hám qaraqalpaq ádebiy ortalıǵı», «Kewil kewilden suw isher», «Взаимное обогощение литератур», «Magtymguly Garagalpagystanda» atamalarındaǵı kitapları da ilimpazlar, ziyalılar hám keń jámiyetshilik arasında úlken qızıǵıwshılıq penen kútip alındı.

Óziniń nátiyjeli ilimiy-pedagogikalıq jumısları, jámiyetlik jumıslarda belsendiligi ushın K.Qurambaev Ózbekstan Respublikasınıń Húrmet jarlıǵı, Qaraqalpaqstan Respublikasına miyneti sińgen ilim ǵayratkeri, Ózbekstan hám Qaraqalpaq xalıq bilimlendiriw aǵlası, Túrkmenstan Respublikasınıń Maqtumqulı Pıraǵıy xalıqaralıq mámleketlik sıylıǵı, «Fidokorona xizmatlari uchun» ordeni hám usı sıyaqlı húrmetli ataqlarǵa múnásip dep tabıldı.

NMPI baspasóz xızmeti.