Búgin, 14-noyabr kúni Ájiniyaz atındaǵı Nókis mámleketlik pedagogikalıq institutında Ózbekstan hám Qaraqalpaqstan Respublikalarına miyneti sińgen ilim ǵayratkeri, Berdaq atındaǵı mámleketlik sıylıqtıń laureatı, filosofiya ilimleriniń doktorı, professor, akademik Jumanazar Bazarbaevtıń 89 jıllıǵına baǵıshlanǵan eslew ilajları bolıp ótpekte.

Bul ilajlar Tariyx fakulteti jámáátiniń baslaması hám institut rektorı B.Otemuratovtıń qollap-quwatlawı tiykarında shólkemlestirildi.

Eslew ilajları tórt bólimnen ibarat bolıp, dáslep akademik Jumanazar Bazarbaev jerlengen Nókis qalasındaǵı «Shorsha baba» qoyımshılıǵında ilimpazdıń qábirin zıyaratlap, gúl sheńberler qoyıwdan baslandı. Ilajǵa institut prorektorları, barlıq fakultet dekanları, bólim baslıqları, ilimpaz benen birge islesken jasıúlken kásiplesleri, shańaraq aǵzaları hám aǵayin-tuwısqanları qatnastı.

Bunnań soń kesheniń ekinshi bólimi – akademik Jumanazar Bazarbaevtıń atın máńgilestiriw, onıń ómir hám miynet jolın keleshek awladqa úlgi etip kórsetiw maqsetinde instituttıń Tariyx fakulteti imaratında ilimpazdıń atına shólkemlestirilgen muzeydi tamashalaw máresimi bolıp ótti.

Muzey ilimpazdıń jumıs xanasınan shólkemlestirilgen bolıp, bul jerde ilimpazdıń jaslıq dáwirinen baslap basıp ótken ómir jolın sáwlelendiriwshi fotobannerler, ilimpazdıń qálemine tiyisli dóretpeler, ómir jolı dawamında qolǵa kirgizgen mámleketlik sıylıqları, kókirek nıshanları, diplomlar, húrmet jarlıqları, fotoalbomları hám ilimpaz haqqında dóretilgen videorolikler orın alǵan. Eksponatlardan ayrıqsha kózge taslanıp turǵanı, ilimpazdıń jumıs stolı bolıp, ol jerde kostyumı, qol tayaǵı, papkası, hátteki, kóz áynegi tap jumıs payıtındaǵıday etip jaylastırılǵan.

Máresim sońında institut prorektorları, birge islesken kásiplesleri, shańaraq aǵzaları muzeyge qoyılǵan «Eslew kitabı»na ózleriniń jıllı sózlerin jazıp qaldırdı.

Eslew ilajları akademiktiń ómirine baǵıshlanǵan kórgizbe hám saltanatlı konferenciya menen dawam etedi.

NMPI baspasóz xızmeti.