Qaraqalpaqstan Respublikası Shańaraq hám hayal-qızlar komiteti tárepinen «Jıl hayalı» tańlawınıń Qaraqalpaqstan Respublikası basqıshı ótkerildi.

Quwanıshlısı, tańlawda Ájiniyaz atındaǵı Nókis mámleketlik pedagogikalıq institutı Psixologiya kafedrasınıń docenti, pedagogika ilimleri boyınsha filosofiya doktorı (PhD) Aydın Daukeeva «Jıldıń belsendi ilimpaz hayalı» nominaciyasınıń jeńimpazı dep tabıldı hám Tashkent qalasında bolıp ótetuǵın final basqıshına jollama aldı.

Tańlawǵa ulıwma respublikamız rayonları, mákeme, kárxana hám shólkemlerden 21 hayal-qız qatnastı.

– Tańlawda ilimiy miynetlerimiz, shákirt studentlerimizdiń qolǵa kirgizgen jetiskenlikleri esapqa alındı. Tańlawda jeńimpaz bolǵanım institut jámááti, atap aytqanda, Pedagogika fakulteti psixologiya kafedrası aǵzalarınıń qollap-quwatlawı nátiyjesi dep esaplayman hám olardan sheksiz minnetdarman, – deydi Aydın Daukeeva.

Biz docent Aydın Daukeevaǵa tańlawdıń respublikalıq basqıshında áwmet tilep qalamız!

NMPI baspasóz xızmeti.