Usı jıldıń 7-20-noyabr kúnleri aralıǵında Ájiniyaz atındaǵı Nókis mámleketlik pedagogikalıq institutı Shet tilleri fakulteti inglis tili hám ádebiyatı kafedrasınıń baslıǵı A.Tajieva hám docent D.Mamırbaevalar Qazaqstan Respublikası Shımkent qalasındaǵı Orta Aziya innovaciyalıq universiteti, sonday-aq, Astana qalasındaǵı L.N.Gumilyov atındaǵı Evraziya milliy universitetinde pedagogikalıq tájiriybe almasıw hám eki tárepleme birge islesiwdi jetilistiriw maqsetinde xızmet saparında bolıp qayttı.

Inglis tili hám ádebiyatı kafedrasınıń Qazaqstan Respublikasındaǵı usı joqarı oqıw orınları menen birge islesiw baǵdarındaǵı baylanısları birneshe jıllardan berli dawam etip kelmekte.

Ásirese, professor-oqıtıwshılar hám studentler almasıwı, birgelikte ilimiy konferenciyalar shólkemlestiriw baǵdarında bir qatar unamlı nátiyjelerge erisildi.

Xızmet saparı sheńberinde institut professor-oqıtıwshıları Qazaqstandaǵı joqarı oqıw orınlarınıń magistratura qánigeligi studentlerine shet tillerin oqıtıwdıń zamanagóy usılları boyınsha lekciyalar oqıdı.

Sonıń menen birge, professor-oqıtıwshılar ushın «XXI ásirde inglis tilin oqıtıw kónlikpelerin rawajlandırıw: PRESET tájiriybesi» atamasında seminar shólkemlestirdi.

NMPI baspasóz xızmeti.