Ájiniyaz atındaǵı Nókis mámleketlik pedagogikalıq institutında «Debat» intellektual oyının shólkemlestiriw boyınsha seminar bolıp ótti.

Institut jaslar awqamı baslanǵısh shólkeminiń jetekshisi B.Gúlimbetov tárepinen shólkemlestirilgen seminarǵa barlıq fakultetlerdiń belsendi studentleri qatnastı.

Seminarda «Debat» intellektual oyınınıń Ózbekstan Respublikalıq final basqıshlarında institutımız komandası quramında qatnasıp, tájiriybe toplaǵan, házirgi waqıtta magistratura qánigeliginde oqıwın dawam ettirip atırǵan Tursınbay Ilyasov studentlerge bul oyınnıń shártleri, qaǵıydaları, oyında jeńimpaz bolıw ushın nelerge tiykarǵı itibardı qaratıw zárúrligi haqqında prezentaciya arqalı túsinikler berdi.

Erkin pikirleytuǵın, óziniń turmıslıq poziciyasına iye bolǵan, turmısımızdaǵı jámiyetlik-siyasiy, social-ekonomikalıq waqıyalardı sistemalı túrde analizlep, logikalıq pikirleytuǵın, sheber túrde debat alıp baratuǵın jaslardı tárbiyalaw búgingi kúnniń áhmiyetli wazıypalarınıń biri bolıp tabıladı.

– Biz sońǵı jıllarda bilimlendiriwge ayrıqsha itibar qaratıp, qararlar qabıl etkenimizdiń, kitap oqıwdı xoshametlegenimizdiń nátiyjesin búgingi jaslarda kórip, quwanaman. Men sizler menen maqtanaman! Biz xalqımızdı razı etiw, insan qádiri joqarı bolǵan jámiyet qurıw jolın tańladıq. Buǵan erisiwde bizlerge kim tiykarǵı suyenish boladı? Álbette, siz sıyaqlı bilimli hám watanın súyetuǵın jaslar, – dep aytıp ótken edi Prezident Sh.Mirziyoev Buxaradaǵı intellektual jaslar menen ushırasıwında.

Seminarda studentler eki komandaǵa bólingen halda tastıyıqlawshı hám biykarlawshı poziciyalarda kitaplar jáne olardıń elektron variantlarınıń turmısımızdaǵı áhmiyeti haqqında kórgizbeli oyın ótkerdi.

Seminar qatnasıwshıları ótkerilgen oyın arqalı óz bilim hám kónlikpelerin arttırdı.

Ilaj sońında kelesi hápteden baslap fakultetler arasında «Debat» intellektual oyının ótkeriw boyınsha wazıypalar belgilep alındı.

NMPI baspasóz xızmeti.