Ájiniyaz atındaǵı Nókis mámleketlik pedagogikalıq institutı Súwretlew óneri hám texnologiyalıq tálim fakultetinde «Tálimdi jetilistiriwde innovaciyalıq usılda oqıtıw hám tárbiyalaw» atamasındaǵı respublikalıq ilimiy-ámeliy konferenciya bolıp ótti.

Ilaj fakultet studentleriniń ámeliy sabaqlar waqtında islegen hár qıylı buyımları, qol óneri úlgilerinen ibarat kórgizbe menen baslandı.

Konferenciyanıń ashılıw plenarlıq májilisinde instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov, ilimiy isler hám innovaciyalar boyınsha prorektor M.Jalelovlar sózge shıǵıp, konferenciyanıń maqseti házirgi waqıtta oqıw orınlarında ilim hám tálim-tárbiya máseleleri boyınsha alıp barılıp atırǵan jumıslardı talqılaw, úyreniw hám nátiyjelerin ámeliyatqa engiziwden ibarat ekenligin atap ótti.

Respublikamızdıń bir qatar joqarı oqıw orınlarınıń professor-oqıtıwshıları, doktorantlar, magistrantlar, studentler, sonday-aq, ilimiy-izertlew institutlarınıń ilimpazları, akademiyalıq liceyler hám mekteplerdiń muǵallimleri menen óz ara tájiriybe almasıwdı maqset etken ilajda pedagoglar jumıslarınıń maqseti hám wazıypaların belgilewdegi kásiplik kompetenciyalar, texnologiyalıq tálim baǵdarında bolajaq oqıtıwshılardı tayarlawda innovaciyalıq qatnas mashqalaları, injenerlik grafikası páni mısalında studentlerdiń ózbetinshe jumısların shólkemlestiriw máseleleri sıyaqlı temalarda bayanatlar jasaldı.

Konferenciya óz jumısın sekciyalarda dawam ettirdi.

NMPI baspasóz xızmeti.