Ájiniyaz atındaǵı Nókis mámleketlik pedagogikalıq institutında qaraqalpaq tiline mámleketlik til biyligi berilgenine 33 jıl tolıwı múnásibeti menen «Qaraqalpaq filologiyasınıń rawajlanıwı hám keleshektegi áhmiyetli máseleleri: ilim hám innovaciyalıq texnologiyalar» atamasındaǵı respublikalıq ilimiy-ámeliy konferenciya bolıp ótti.

Túrkiy tiller fakulteti qaraqalpaq tili kafedrası tárepinen shólkemlestirilgen ilajǵa Respublikalıq Ruwxıylıq hám aǵartıwshılıq orayınıń sanlı úgit-násiyat bólimi baslıǵı F.Jabborov, oraydıń Qaraqalpaqstan Respublikalıq bólimi baslıǵı T.Atamuratov, professor-oqıtıwshılar hám studentler qatnastı.

Ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp bardı.

Konferenciyada qaraqalpaq tiline mámleketlik til biyliginiń beriliw tariyxı, túrkiy tiller sistemasında qaraqalpaq tiliniń mámleketlik til sıpatındaǵı ornı hám búgingi kúnde ushırasıp atırǵan mashqalalar, olardı sheshiw ushın aldaǵı wazıypalar boyınsha filologiya ilimleriniń kandidatı, qaraqalpaq tili kafedrasınıń baslıǵı E.Allanazarov, filologiya ilimleriniń doktorı, docent G.Qurbaniyazovlar bayanatlar jasadı.

Bayanatlarda sóz etilgenindey, házirgi waqıtta dúnyada altı mıńnan aslam tiller bolǵanı menen, olardıń tek 170 ten aslamı óziniń mámleketlik til statusına iye. Olar arasında qaraqalpaq tiliniń de bar ekenligi úlken quwanısh hám maqtanısh bolıp tabıladı.

Qaraqalpaq tiline mámleketlik til biyliginiń beriliwi xalqımızdıń ózligin ańlawı, ǵárezsiz turmısta ómir súriwi hám ata-babalardan miyras bolıp kiyatırǵan milliy miyraslarımız, qádiriyatlarımızdı qásterlep-saqlap, keleshek áwladlarǵa jetkerip beriwdey ullı iste taslanǵan áhmiyetli, tariyxıy qádem boldı.

Bayram múnásibeti menen institut student-jasları arasında ótkerilgen maqalalar tańlawında jeńimpaz bolǵan studentlerge diplom hám estelik sawǵaları tapsırıldı.

Sonday-aq, Respublikalıq Ruwxıylıq hám aǵartıwshılıq orayı Qaraqalpaqstan Respublikalıq bólimi tárepinen járiyalanǵan «Mártebeń bálent bolsın, ana tilim!» atamasındaǵı sociallıq videorolikler tańlawında jeńimpaz bolǵan hám sıylı orınlardı iyelegen dóretiwshilerge diplomlar, aqshalay sıylıqlar tapsırıldı.

NMPI baspasóz xızmeti.