8-dekabr – Ózbekstan Respublikası Konstituciyası qabıl etilgen kún. Bıyıl Bas nızamımızdıń qabıl etilgenine 30 jıl tolmaqta. Ájiniyaz atındaǵı Nókis mámleketlik institutında usı sánege arnalǵan saltanatlı ilaj bolıp ótti.

Ózbekstan hám Qaraqalpaqstan Respublikalarınıń mámleketlik gimnleri menen baslanǵan ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp bardı.

Saltanatlı ilajǵa Qaraqalpaqstan Respublikası Joqarǵı Keńesiniń Nızamlılıq, sud-huqıq hám korrupciyaǵa qarsı gúresiw máseleleri komitetiniń baslıǵı Z.Reymova, Qaraqalpaqstan Respublikası Hákimshilik sudınıń baslıǵı Á.Nurlepesov, Qaraqalpaqstan Respublikası Ishki isler ministrligi Tergew basqarmasınıń juwaplı xızmetkeri S.Nuratdinov, fakultet dekanları hám olardıń orınbasarları, professor-oqıtıwshılar, studentler qatnastı.

Ilajda atap ótilgenindey, tiykarǵı nızamımız óziniń tereń oylanǵan principleri hám qaǵıydaları menen ajıralıp, elimizdiń táǵdirin, hár bir insannıń huqıq jáne erkinliklerin belgilewde áhmiyetli hújjet bolıp esaplanadı.

1992-jılı 8-dekabr kúni ǵárezsiz Ózbekstannıń Konstituciyası qabıl etildi. Konstituciyanı islep shıǵıwda nızamshılıqtaǵı aldınǵı sırt el tájiriybeleri menen birgelikte xalqımızdıń kóp ásirlik mentaliteti, jasaw sharayatı, ata-babalardan miyras bolıp kiyatırǵan úrp-ádetleri de basshılıqqa alındı.

Konstituciyada tiykarǵı itibar insan hám onıń huqıqları jáne erkinlikleri, yaǵnıy Ózbekstan Respublikasınıń hár bir puqarasına jeke huqıq hám erkinlikler, siyasiy hám sociallıq-ekonomikalıq huqıqlardıń kepillikleri támiyinlendi.

Elimizde nızam ústinligin támiyinlew arqalı puqaralıq jámiyetin qurıw, bunıń ushın xalqımızdıń huqıqıy mádeniyatın arttırıw, xalqımızdıń búgingi ómirden razı bolıp jasawı ushın olarǵa múnásip turmıs sharayatların jaratıp beriw baǵdarında sońǵı jıllardaǵı alıp barılıp atırǵan jumıslar ayrıqsha atap ótildi.

Tiykarǵı nızamımızda keleshek áwladlardıń bilim alıwı, kásip mamanı bolıwı, ozıq-oylı, tereń pikirleytuǵın, jetik insan bolıp jetilisiwi ushın zárúr bolǵan principler hám qaǵıydalar belgilep berilgen. Sońǵı jılları joqarı bilimlendiriw sistemasına qaratılıp atırǵan itibar hám ǵamqorlıqlar usı maqsetlerge erisiw ushın xızmet etedi. Qaraqalpaqstanda joqarı oqıw orınlarınıń sanı sońǵı bes jıldıń ishinde onǵa jetkenligi, olardıń materiallıq-texnikalıq bazasınıń jetilistiriwi, qabıllaw kvotaları sanınıń kóbeytiliwi, Qaraqalpaqstannıń shetki aymaqlarında jasap atırǵan jaslar, hayal-qızlardı hár tárepleme qollap-quwatlaw maqsetinde qosımsha grant orınlarınıń berilip atırǵanı Konstituciyada belgilengen normalardıń ámeldegi kórinisleri bolıp tabıladı.

Usınday imkaniyatlar nátiyjesinde elimiz jasları ilim, bilimlendiriw, mádeniyat, sport hám turmıstıń basqa da salalarında úlken tabıslardı qolǵa kirgizip kelmekte.

Ilaj dawamında instituttıń milliy ideya, ruwxıylıq tiykarları hám huqıq tálimi kafedrası docenti T.Qudaybergenova, usı kafedranıń aǵa oqıtıwshısı B.Arzieva Ózbekstan Respublikası Konstituciyasınıń qabıl etiliw tariyxı, búgingi kúndegi turmısımızdaǵı áhmiyeti haqqında bayanatlar jasadı.

Óz gezeginde, student-jaslar da sózge shıǵıp, oqıp bilim alıwı, kásip-óner iyelewi ushın jaratılǵan sharayatlardıń tiykarında Konstituciyada belgilengen normalardıń bar ekenligin ayrıqsha atap ótti jáne jaslardıń konstituciyalıq bilimlerin bekkemlew maqsetinde ámelge asırılıwı zárúr bolǵan ilajlar haqqında ózleriniń pikir hám usınısların bildirdi.

NMPI baspasóz xızmeti.