Ájiniyaz atındaǵı Nókis mámleketlik pedagogikalıq institutında dzyudo hám milliy gúres boyınsha xalıqaralıq dárejedegi sport ustaları, birneshe márte Aziya hám jáhán birinshilikleriniń jeńimpazı, Olimpiada oyınlarınıń sıylı orın iyeleri, Ózbekstanda xızmet kórsetken sportshılar Abdulla Tangriev hám Rishod Sobirovlar menen ushırasıw bolıp ótti.

Ilaj Ózbekstan hám Qaraqalpaqstan Respublikalarınıń mámleketlik gimnleri atqarılıwı menen baslandı.

Ushırasıwǵa instituttıń Dene mádeniyatı fakulteti professor-oqıtıwshıları, tyutorları hám studentleri qatnastı.

Ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp bardı.

Professor-oqıtıwshılar hám studentler menen ashıq sáwbetlesiw tárizinde ótken ushırasıwda qatnasıwshılar palwanlardıń ómiri, sportshılıq xızmetleri, respublikalıq hám xalıqaralıq jarıslarda toplaǵan bay tájiriybesi boyınsha kóplegen maǵlıwmatlarǵa iye boldı.

Dzyudo boyınsha dúnyanıń absolyut chempionı, Pekin Olimpiadasınıń gúmis medalı iyesi, Aziya hám jáhán chempionatlarında birneshe mártebe jeńimpaz bolıp, elimiz bayraǵın kóklerde jelbiretken Abdulla Tangriev, sonday-aq, dzyudo boyınsha eki márte jáhán chempionı, Pekin, London hám Rio Olimpiadalarında bronza medallar jeńimpazı bolǵan Rishod Sobirovlar bunday úlken nátiyjelerge erisiwdiń tiykarında tınımsız miynetler, trenerlerdiń úgitlerine ámel etiw, óz ústinde tınbay izleniw, bilim hám kónlikpelerdi arttırıp barıw sıyaqlı háreketler turatuǵınlıǵın óz ómirinen alınǵan mısallar menen atap ótti.

Ushırasıwda qatnasıwshılar sportshılardıń psixologiyalıq hám fizikalıq tayarlıqları, balalıqtaǵı arzıw-niyetleri, jarıslardaǵı tájiriybelerine baylanıslı sorawlarına miymanlardan tolıq juwaplar aldı.

Ilajda miyman sportshılar mámleketimizge joqarı sheberlikke iye pedagog kadrlardı jetkerip berip atırǵan institut professor-oqıtıwshılar jámáátine, sonday-aq, oqıwda, ilim-bilimde, mádeniyat hám sport baǵdarlarında jaqsı nátiyjelerge erisip kiyatırǵan studentlerge kelesi jumıslarında áwmet tiledi.

NMPI baspasóz xızmeti.