Ájiniyaz atındaǵı Nókis mámleketlik pedagogikalıq institutınıń kishi májilisler zalında «9-dekabr – Xalıqaralıq korrupciyaǵa qarsı gúresiw kúni»ne baǵıshlanǵan esseler tańlawı jeńimpazların sıylıqlaw ilajı bolıp ótti.

Oǵan instituttıń jaslar menen islesiw boyınsha dekan orınbasarları, tyutorlar, professor-oqıtıwshılar hám tańlaw jeńimpazları qatnastı.

Ilajdı Korrupciyaǵa qarsı gúresiw «Komplaens qadaǵalaw» sistemasın basqarıw bólimi baslıǵı P.Xojabekov kiris sóz benen ashıp berdi hám basqarıp bardı.

Esseler tańlawına 420 dan artıq materiallar kelip tústi hám tiyisli qánigeler tárepinen obyektiv bahalandı.

Tańlawda 1-orındı alǵan Shet tilleri fakultetine televizor, 2-orındı alǵan Baslawısh tálim fakultetine elektr pechi, 3-orındı iyelegen Pedagogika fakultetine utyug, al Dene mádeniyatı, Pedagogika, Fizika-matematika hám Baslawısh tálim fakultetleri studentlerine flesh-kartalar tapsırıldı.

Sonday-aq, ilaj sheńberinde videorolikler, plakatlar hám esseler Tańlawına belsendi qatnasıp, joqarı nátiyjelerdi kórsetken 100 ge jaqın student-jaslar institut rektorı hám birinshi prorektorınıń I, II, III dárejeli diplomları menen, jáne de korrupciyaǵa qarsı gúresiwde belsendilik kórsetken Shet tilleri, Fizika-matematika, Baslawısh tálim, Tariyx, Dene mádeniyatı, Súwretlew óneri hám texnologiyalıq tálim hám Ellikqala pedagogika fakultetleri dekan orınbasarları hám tyutorları rektor hám birinshi prorektordıń húrmet jarlıqları menen sıylıqlandı.

Óz gezeginde, Fizika-matematika hám Shet tilleri fakulteti studentleri sózge shıǵıp, tańlawdı shólkemlestirgen instituttıń Korrupciyaǵa qarsı gúresiw «Komplaens qadaǵalaw» sistemasın basqarıw bólimine hám bólim baslıǵı P.Xojabekovqa minnetdarshılıǵın bildirdi.

NMPI Korrupciyaǵa qarsı gúresiw «Komplaens qadaǵalaw» sistemasın basqarıw bólimi.