Ózbekstan Respublikası Prezidentiniń «Mámleketlik joqarı bilimlendiriw mákemelerine oqıwǵa qabıllaw processlerin shólkemlestiriw haqqında»ǵı qararına muwapıq, 2022-2023-oqıw jılınan baslap mámleketlik joqarı oqıw orınlarında magistraturaǵa qabıllaw bir jılda eki márte – avgust hám yanvar aylarında shólkemlestiriliwi belgilep qoyılǵan edi.

Bunda avgust ayındaǵı qabıllaw – gezektegi oqıw jılı ushın tastıyıqlanǵan mámleketlik grant hám tólemli kontrakt tiykarındaǵı kvotalar ushın ótkerilse, yanvar ayındaǵı qabıllaw – jazda tolmay qalǵan orınlar hám Mámleketlik qabıllaw komissiyası tárepinen tastıyıqlanǵan kontrakt tiykarındaǵı qosımsha kvotalar ushın bolıp ótetuǵınlıǵı belgilengendi.

2022-2023-oqıw jılı ushın mámleketlik joqarı oqıw orınlarınıń magistratura qánigeliklerine qısqı qabıllaw ministrliktiń rásmiy http://magistr.edu.uz veb-saytı arqalı 2022-jıldıń 20-dekabr kúninen onlayn tárizde baslanıp, 2023-jıldıń 10-yanvar sánesine shekem (sol kúni de) dawam etiletuǵınlıǵı málim etildi.

Xabarıńız bar, Prezident qararına muwapıq, magistraturaǵa qabıllaw abiturienttiń bakalavriat diplom balınıń ortasha kórsetkishi hám shet tilin biliw dárejesi boyınsha tiyisli milliy yamasa xalıqaralıq sertifikat tiykarında ámelge asırılıp, qánigelik páninen imtixan ótkerilmeytuǵınlıǵı engizilgen edi.

Dıqqatqa ılayıqlısı, tek ǵana bıyılǵı qabıllawda talabanlarǵa qosımsha jeńillik berilip, aldınǵısınan ózgeshe tárizde, tańlawlarda shet tilin biliwdiń barlıq dárejedegi sertifikatına iye talabanlar da qatnasıwına ruxsat berildi.

Joqarı bilimlendiriw, ilim hám innovaciyalar ministrligi málimleme xızmetiniń xabar beriwinshe, bıyılǵı qısqı qabıllawda da aldınǵısınday eń dáslep joqarı dárejeli til sertifikatına iye bolǵan talabanlardıń oqıwǵa kiriwine tiykar jaratıladı. Tolmay qalǵan orınlarǵa ǵana shet tilin biliw boyınsha barlıq dárejedegi sertifikatqa iye bolǵan talabanlar oqıwǵa usınıs etiliwi múmkin. Bunda olar oqıw dawamında talap etilgen sertifikatlardı alıwı shárt boladı. Kerisinshe jaǵdayda, juwmaqlawshı mámleketlik attestaciyasına ruxsat berilmeydi.

Ministrlik bul ózgeshelik Mámleketlik qabıllaw komissiyası tárepinen tek ǵana bıyılǵı magistraturanıń qısqı qabıllawı ushın engizilip atırǵanın esletip ótken.

Qosımsha etiliwinshe, 2021-jıldaǵı qabıllawda shet tilin biliw dárejesi boyınsha sertifikatqa iye 768 talaban hújjet tapsırǵan bolsa, 2022-jıldıń jazǵı qabıllawındaǵı tańlawda shet tili sertifikatına iye bolǵan 4 578 talaban qatnasqan. 20-dekabrde baslanǵan magistraturanıń qısqı qabıllawına bir kúnniń ózinde 1800 ge shamalas talaban hújjet tapsırǵan.

Islam Matekov,
Karinform.uz.