Ájiniyaz atındaǵı Nókis mámleketlik pedagogikalıq institutında Ózbekstan Respublikası Oliy Majlisi Nızamshılıq palatasınıń deputatı, Ilim, bilimlendiriw, mádeniyat hám sport komitetiniń aǵzası Muxtar Ibragimov penen ushırasıw bolıp ótti.

Ushırasıwǵa fakultet dekanlarınıń orınbasarları, professor-oqıtıwshılar hám tyutorlar qatnastı.

Ilajda deputat M.Ibragimov sózge shıǵıp, Ózbekstan Respublikası Prezidenti Shavkat Mirziyoyevtiń Oliy Majliske hám respublikamız xalqına Múrájatı jáne onda belgilep berilgen wazıypalar haqqında keń túrde toqtaldı.

Sońǵı jıllarda respublikamızda joqarı bilimlendiriw tarawında ámelge asırılıp atırǵan keń kólemli reformalardıń nátiyjesinde joqarı oqıw orınlarınıń sanı 2,5 esege kóbeyip, jaslardı joqarı bilimlendiriwge qamtıp alıw dárejesi aldınǵı 9 procentten 38 procentke kóterildi.

Álbette, tarawda san menen birgelikte sapanı da joqarı dárejede jetilistirip barıw aldımızǵa qoyǵan maqsetlerimizge erisiw ushın tiykar bolıp xızmet etedi. Múrájatta joqarı bilimlendiriwde oqıtıwdıń sapasın arttırıw hár bir joqarı oqıw ornı jámáátiniń, professor-oqıtıwshılarınıń tiykarǵı maqseti bolıwı kerekligi atap ótildi.

Bilimlendiriwdiń sapasın arttırıw – Jańa Ózbekstandı rawajlandırıwdıń birden-bir durıs jolı bolatuǵınlıǵına ayrıqsha toqtalıp, 2023-jılǵa «Insanǵa itibar hám sapalı bilimlendiriw jılı» dep atama beriwdi usınıs etti.

Oliy Majlis deputatı bıyılǵı jılı barlıq oqıw-tárbiya orınlarında bilim beriwdiń sapasın joqarı dárejege alıp shıǵıw ushın mektepke shekemgi, ulıwma orta bilim beriw, joqarı bilimlendiriw tarawlarında ámelge asırılıwı belgilengen jumıslardıń mazmunı jáne áhmiyetine ayrıqsha toqtalıp ótti.

Sonıń menen birge, ushırasıwda Ózbekstan Respublikasınıń jańa redakciyadaǵı Miynet kodeksi, onıń usı kúnge shekem ámel etip kelgen kodeksten ózgeshelikleri, normalarına kirgizilgen ózgerisler hám qosımshalar, jańadan kirgizilgen tártipler haqqında tolıq maǵlıwmat berdi.

Ushırasıwda qatnasıwshılar Oliy Majlis deputatına ilim, bilimlendiriw, jaslar tárbiyası, sociallıq máseleler boyınsha ámelge asırılıp atırǵan reformalar haqqında óz pikir hám usınısların bildirdi.

NMPI baspasóz xızmeti.