Ájiniyaz atındaǵı Nókis mámleketlik pedagogikalıq institutı jámááti búgingidey sınawlı kúnlerde xalqımız benen iyinles bolıp, olardıń awırın jeńil, alısın jaqın etiwge óz úleslerin qospaqta.

Qaraqalpaqstan Respublikası Joqarǵı Keńesi baslaması menen elimiz boylap «Sawaplı isti hár kim, hár kúni islewi kerek» degen súren tiykarında dawam etip atırǵan, sonday-aq, «Mehir háreketi» akciyaları sheńberinde ótkerilip atırǵan hár qıylı qayırqomlıq ilajlarında instituttıń prorektorları, fakultet dekanları hám olardıń orınbasarları, bólimler hám kafedralardıń baslıqları, professor-oqıtıwshılar menen tyutorlar ózleriniń iygilikli baslamaları menen múnásip úles qosıp kelmekte.

Sınawlı kúnlerde bir-birewge demew bolıp, járdem qolın sozıw, qolınan kelgeninshe bir-birin qollap-quwatlaw xalqımızǵa tán awızbirshilik hám úlken adamgershiliktiń úlgisi, aǵla pazıyletleriniń biri bolıp tabıladı.

Institut jámááti usınday baslamalar menen usı jıldıń 16-yanvar kúninen baslap paytaxtımız Nókis qalasındaǵı oraylıq diyqan bazarı hám rayonlar aralıǵında ózleriniń jeke avtotransport quralları menen xalqımızdı óz mánzillerine biypul jetkerip, xalıqtıń alǵısın, duwa-pátiyasın almaqta.

Biz usınday iygilikli jumıslarda belsendilik kórsetip atırǵan bárshege sheksiz húrmet hám minnetdarshılıǵımızdı bildiremiz.

NMPI baspasóz xızmeti.