Ájiniyaz atındaǵı Nókis mámleketlik pedagogikalıq institutında oqıp atırǵan student-jaslardıń qısqı dem alıs dáwirin mazmunlı ótkeriw, sonday-aq, Ózbekstan Respublikası Qurallı Kúshleriniń dúzilgenine 31 jıl tolıwı hám 14-yanvar – Watan qorǵawshıları kúni múnásibeti menen onlayn tárizde «Zakovat» intellektual oyını ótkerildi.

Intellektual oyın 1 (bir) turdan ibarat boldı hám oǵan hár bir fakultetten bir komandadan qatnastı.

Komandalardıń quramı fakultet dekanları (magistratura hám sırtqı bólim baslıqları)nıń usınısı tiykarında dizimge alındı.

Sorawlar «Zakovat» intellektual klubı Qaraqalpaqstan Respublikası koordinatorları tárepinen dúzildi.

Solay etip, oyında sorawlarǵa eń kóp durıs juwap berip, joqarı ball toplaǵan Tariyx fakulteti komandası 1-orındı iyeledi. 2-orın Baslawısh tálim, al sıylı 3-orın Shet tilleri fakultetleriniń komandalarına nesip etti.

Esletip ótemiz, oyında 1-orındı iyelegen komanda aǵzalarınıń hár birine bazalıq stipendiya muǵdarınıń 2 (eki) esesi, 2-orındı iyelegen komanda aǵzalarınıń hár birine bazalıq stipendiya muǵdarınıń 1 (bir) esesi, 3-orındı iyelegen komanda aǵzalarınıń hár birine bazalıq stipendiya muǵdarınıń 0,5 (yarım) esesi muǵdarında sıylıqlanadı.