Ferǵana wálayatınıń Qoqand qalasında Respublikalıq mádeniyat mákemeleriniń jumısların shólkemlestiriw ilimiy-metodikalıq orayı tárepinen «Baqsıshılıq ónerinde ustaz-shákirt dástúrleri» atamasında respublikalıq ilimiy-ámeliy konferenciya jáne Ózbekstan xalıq baqsılarınıń dóretiwshilik gastrol koncerti shólkemlestirildi.

Respublikalıq kólemde ótkerilgen ilajǵa Ájiniyaz atındaǵı Nókis mámleketlik pedagogikalıq institutı Pedagogika fakulteti muzıkalıq tálim kafedrasınıń docenti Artıqbay Erejepov, magistrant, Zulfiya atındaǵı Mámleketlik sıylıqtıń laureatı Erkinay Orınbaeva hám 3-kurs studenti Umida Tursınbaevalar qatnastı.

Konferenciya sheńberinde ótkerilgen plenar májilis hám sekciyalarda institut wákilleri elimizde xalıq awızeki óneriniń tákirarlanbas úlgisi esaplanǵan baqsıshılıq ónerin rawajlandırıw, keleshek áwladlarǵa jetkeriwge ayrıqsha itibar qaratılıp atırǵanı, atap aytqanda, bul baǵdarda qabıl etilgen Prezident párman hám qararları tarawdıń rawajlanıwına úlken jol ashıp, mámleketimiz basshısınıń baslaması menen Xalıqaralıq baqsıshılıq óneri festivalın ótkeriw jolǵa qoyılǵanlıǵı haqqında bayanatlar jasaldı.

Ilajda bayanatshılar bul baǵdardaǵı jumıslardı bunnan bılay da jetilistiriw, «ustaz-shákirt» dástúriniń áhmiyeti haqqında óz pikir-usınısların bildirdi.

Konferenciya juwmaǵında institut wákilleri koncert baǵdarlamasında qatnastı hám sertifikat penen sıylıqlandı.