Ájiniyaz atındaǵı Nókis mámleketlik pedagogikalıq institutında «Biz, jaslar korrupciyaǵa qarsımız» atamasında tiyisli taraw qánigeleri menen ushırasıw hám huqıqıy úgit-násiyat ilajı bolıp ótti.

Ushırasıwǵa Nókis qalalıq Ádillik bólimi Yuridikalıq xızmet kórsetiw orayı bas yuristkonsultı I.Rametullaev, «Madad» mámleketlik emes kommerciyalıq emes shólkemi Nókis qalalıq huqıqıy másláhát byurosınıń bas qánigesi A.Aldamuratova, instituttıń Korrupciyaǵa qarsı gúresiw «Komplaens qadaǵalaw» sistemasın basqarıw bólimi baslıǵı P.Xojabekov, sonday-aq, Pedagogika fakultetiniń professor-oqıtıwshıları, tyutorları hám studentleri qatnastı.

Ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp bardı.

Ushırasıwda sózge shıqqanlar elimizde korrupciyaǵa qarsı gúresiw baǵdarında ámelge asırılıp atırǵan jumıslar, Ózbekstan Respublikasınıń «Korrupciyaǵa qarsı gúresiw haqqında»ǵı nızamınıń áhmiyeti, usı normativlik-huqıqıy hújjet tiykarında islenip atırǵan ilajlar haqqında maǵlıwmatlar berdi.

Respublikamızda Korrupciyaǵa qarsı gúresiw agentligi, Bas prokuratura, Mámleketlik qáwipsizlik xızmeti, Ishki isler ministrligi, Ádillik ministrligi, Bas prokuratura janındaǵı Ekonomikalıq jınayatlarǵa qarsı gúresiw departamenti usı baǵdarda jumıs alıp baratuǵın tiykarǵı mámleketlik uyımlar bolıp tabıladı. Sonday-aq, respublikamızdıń hár bir aymaǵında Korrupciyaǵa qarsı gúresiw boyınsha aymaqlıq keńesler, sonıń ishinde, joqarı oqıw orınlarında da bul boyınsha bólimler shólkemlestirildi.

Degen menen, bul illetke qarsı gúresiw, onıń profilaktikasın alıp barıw tek ǵana usı strukturalardıń jumısı bolıp qalmastan, keń jámiyetshiliktiń birgeliktegi háreketleri nátiyjesinde ámelge asatuǵınlıǵı, bunda, álbette, jaslardıń huqıqıy mádeniyatınıń joqarı bolıwı, jámiyetlik qadaǵalawdı alıp barıwdıń áhmiyeti, bul baǵdarda institutta alıp barılıp atırǵan jumıslar atap ótildi.

Ushırasıwda korrupciyaǵa qarsı gúresiwde Singapur tájiriybesi haqqında mısallar keltirilip, onıń áhmiyetli baǵdarları haqqında maǵlıwmatlar berildi.

Ilaj kún tártibindegi másele boyınsha pikirlesiwler hám dodalawlar menen dawam etti.

Usı baǵdardaǵı úgit-násiyat ilajları instituttıń barlıq fakultetleri kesiminde ótkerilmekte.

NMPI baspasóz xızmeti.