Ájiniyaz atındaǵı Nókis mámleketlik pedagogikalıq institutında «Ilimiy-izertlewdiń ornı: Mashqala hám sheshimler» atamasında ótkerilgen kóp tarmaqlı xalıqaralıq ilimiy-ámeliy konferenciyasınıń sıylıqlaw ilajı bolıp ótti.

Ilajda instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov sózge shıǵıp, sońǵı jıllarda elimizde jaslardı ilimiy-izertew jumıslarına tartıw, olardı hár tárepleme qollap-quwatlaw, doktorantura basqıshında oqıw niyetinde bolǵan jaslar ushın kvotalardı kóbeytiw, ilimiy-izertlew jumıslarınıń nátiyjelerin ámeliyatqa engiziw baǵdarlarında ámelge asırılıp atırǵan jumıslar haqqında toqtalıp ótti.

«Science Box» jámiyeti tárepinen instituttıń studentler keńesi jetekshileri menen birgelikte shólkemlestirilgen bul konferenciyada elimizdiń kóplegen jas ilimpazları, student, magistrant hám doktorantları menen birge, belgili alımlar, professor-oqıtıwshılar da óz maqalaları menen qatnastı.

Ilajda konferenciyaǵa belsene qatnasqan student-jaslar hám izleniwshiler «Ilimiy izleniwshi» estelik kókirek belgileri hám sertifikatlar menen sıylıqlandı.

NMPI baspasóz xızmeti.