Ájiniyaz atındaǵı Nókis mámleketlik pedagogikalıq institutında 2022-2023-oqıw jılı ushın respublikalıq joqarı oqıw orınlarınıń bakalavriat basqıshı studentleri arasında Ózbekstan Respublikası Prezidenti hám ataqlı mámleketlik stipendiyalarǵa múnásip dep tabılǵan studentler, sonday-aq, instituttıń Ájiniyaz Qosıbay ulı atındaǵı stipendiyası tańlawlarında jeńimpaz bolǵan studentlerge gúwalıqlar tapsırıwǵa arnalǵan saltanatlı ilaj bolıp ótti.

Ilajda institut rektorı B.Otemuratov, prorektorlar Q.Qodirov hám N.Babaniyazovalar sózge shıǵıp, mámleketlik stipendiyalar tańlawlarında, sonday-aq, ilimiy-izertlew jumıslarında úlken nátiyjelerge erisip atırǵan jaslardı qutlıqlap, olardıń oqıwı hám ilimiy jumıslarında tabıslar tiledi.

Sońǵı jıllarda respublikamızda ilimiy hám innovaciyalıq jumıslardı qollap-quwatlaw, kadrlar tayarlaw sistemasın reformalaw boyınsha ámeliy jumıslar alıp barılmaqta. Ásirese, jaslardıń dóretiwshilik, intellektual potencialın júzege shıǵarıw, innovaciyalıq ideyalar, joybarlar hám texnologiyalardı óndiriske engiziw, qábiletli studentler, jas ilimpazlardıń innovaciyalıq jumısların xoshametlew, ilim, bilimlendiriw hám óndiristiń integraciyasın kúsheytiw ushın zárúr sharayatlar jaratılmaqta. Usında imkaniyatlardan nátiyjeli paydalanıp atırǵan jaslar arasınan respublikalıq hám xalıqaralıq pán olimpiadaları, mámleketlik stipendiyalar tańlawlarınıń jeńimpazları jetisip shıqpaqta.

Bıyılǵı oqıw jılında instituttıń 11 studenti Ózbekstan kóleminde ótkerilgen mámleketlik stipendiyalar tańlawında jeńimpaz bolıp, stipendiat atandı. Atap aytqanda:

Shet tilleri fakulteti 4-kurs studenti Islam Dilmanov Ózbekstan Respublikası Prezidenti mámleketlik stipendiyası;

Pedagogika fakulteti 4-kurs studenti Gúlnara Berdixanova Islam Karimov atındaǵı mámleketlik stipendiyası;

Nawayı atındaǵı mámleketlik stipendiyası boyınsha:

Túrkiy tiller fakulteti studentleri Kimyoxon Andaqulova, Aynura Qalıbaeva, Alisher Xushanov;

Pedagogika fakulteti studentleri Dilbar Jumaniyazova, Gúlayım Tilepova, Aynura Bazarbaeva;

Shet tilleri fakulteti studenti Nursultan Nurniyazov;

Baslawısh tálim fakulteti 4-kurs studenti Gúlziya Berdibaeva Ibrayım Yusupov atındaǵı mámleketlik stipendiyası;

Pedagogika fakulteti 4-kurs studenti Arina Zueva Tólepbergen Qayıpbergenov atındaǵı mámleketlik stipendiyası tańlawlarında jeńimpazlar qatarınan orın aldı.

Ilajda mámleketlik stipendiyalar tańlawlarınıń jeńimpazları, sonday-aq, institut kóleminde shólkemlestirilgen Ájiniyaz Qosıbay ulı atındaǵı stipendiya tańlawında jeńimpaz bolǵan studentlerge gúwalıqlar tapsırıldı.

Sonıń menen birge, usı jıldıń yanvar ayında Tashkent qalasındaǵı Aldınǵı texnologiyalar ilimiy-izertlew orayı tárepinen ótkerilgen xalıqaralıq ilimiy forumda óz maqalaları menen qatnasıp, «Ilim maqtanıshı» estelik belgisi hám sertifikatlar menen sıylıqlanǵan bir topar studentler, magistrantlar xoshametlendi.

Ilaj instituttıń muzıkalıq tálim baǵdarınıń talantlı studentleri atqarıwındaǵı koncert baǵdarlaması menen dawam etti.

NMPI baspasóz xızmeti.