Ájiniyaz atındaǵı Nókis mámleketlik pedagogikalıq institutında belgili palwan, el ardaǵındaǵı húrmetli ustaz, xalıq bilimlendiriw aǵlası hám pidayısı Jaqsımurat Mámbetovtıń 80 jıllıq yubileyine arnalǵan ilimiy-teoriyalıq konferenciya bolıp ótti.

Konferenciyaǵa elimizge belgili veteran sportshılar, taraw pidayıları, joqarı oqıw orınlarınıń professorları, fakultet dekanları, ustazdıń kóplegen shákirtleri, sonday-aq, shańaraq aǵzaları, aǵayin-tuwısqanları hám studentler qatnastı.

Ilajda institut rektorı Bayrambay Otemuratov sózge shıǵıp, yubiley iyesin gúllán institut jámááti atınan qutlıqlap, oǵan bekkem densawlıq, elimiz bayraǵın kóklerge kóterip atırǵan shákirtler tayarlawday mashaqatlı jumıslarında tabıslar tiledi.

Jaqsımurat Mámbetov 1943-jıl 10-fevralda ázelden atı shıqqan palwanlar eli bolǵan házirgi Qaraózek rayonınıń Qara buǵa awılında dúnyaǵa keldi. 1963-jılı Qaraqalpaq mámleketlik pedagogikalıq institutınıń dene mádeniyatı fakultetine oqıwǵa kirip, bul jerdi tabıslı pitkerip shıqqannan soń 1970-jıllardan baslap respublikalıq sport komitetinde sport jetekshisi, erkin gúres boyınsha trener, bilimlendiriw ministrligine qaraslı 3-sanlı sport mektebinde erkin gúres boyınsha aǵa trener, sońınan mektep direktorı sıyaqlı jumıslarda jemisli miynet etti.

Ol sportqa bolǵan úlken súyispenshiligi, tınımsız miynetleriniń nátiyjesinde úsh túrli sporttan – milliy gúres, erkin gúres hám dzyudo boyınsha sport ustası dárejesine erisken sheber sport ustası boldı.

J.Mámbetovtıń tarawdaǵı pidayı xızmeti húkimetimiz tárepinen joqarı bahalanıp, Ózbekstan Respublikasınıń «Húrmet jarlıǵı», Ózbekstan Respublikası xalıq bilimlendiriw aǵlası, Ózbekstanǵa miyneti sińgen dene tárbiya pidayısı sıyaqlı birneshe húrmetli ataqlarǵa múnásip dep tabıldı.

1984-2000-jıllar aralıǵında Jaqsımurat Mámbetov Nókis mámleketlik universiteti, Nókis mámleketlik pedagogikalıq institutında oqıtıwshı, kafedra baslıǵı, fakultet dekanı sıyaqdı jumıslardı atqardı.

Miynet jolı dawamında kóplegen shákirtlerge ustazlıq etip, elimizde joqarı sheberlikke iye sportshılardı tárbiyalawda joqarı nátiyjelerge eristi. Onıń shákirtleri búgingi kúnde sport tarawı menen birge xalıq xojalıǵınıń túrli salalarında jemisli miynet etip, mámleketimizdiń rawajlanıwına úlken úleslerin qosıp kelmekte.

Konferenciyada instituttıń dene tárbiyası kafedrasınıń baslıǵı A.Eshbaev, professor Q.Qoщanov, Buxara mámleketlik universiteti professorı B.Mamutov, sonday-aq, belgili sport veteranları, pidayı ustaz-trenerler, yubiley iyesiniń shákirtleri, fakultet dekanları sózge shıǵıp, Jaqsımurat Mámbetovtıń ómiri, miynet jolı haqqında jıynalǵanlarǵa maǵlıwmatlar berdi.

Ilajda belgili veteran ustaz Yu.Kulakov sóz alıp, sporttı rawajlandırıwǵa qosqan úleslerin esapqa alıp «Jaqsımurat Mámbetovtı Qaraqalpaqstan Respublikasında erkin gúres sportınıń atası» dep ayrıqsha atap ótti.

Konferenciya sońında J.Mámbetov kórsetilip atırǵan usınday itibar ushın barlıq shólkemlestiriwshilerge tereń minnetdarshılıǵın bildirdi.

NMPI baspasóz xızmeti.